தளபதி விஜய் நடித்து வரும் ’பீஸ்ட்’ திரைப்படத்தின் படப்பிடிப்பு சென்னை கோகுலம் ஸ்டுடியோவில் நடைபெற்று வருவதாகவும் விஜய் மற்றும் பூஜா ஹெக்டே சம்பந்தப்பட்ட பாடல் காட்சி படமாக்கப்பட்டு வருவதாகவும் தகவல்கள் வெளிவந்த நிலையில், சமீபத்தில் இதே ஸ்டூடியோவில் கார்த்தி நடித்துவரும் ’சர்தார்’ படத்தின் படப்பிடிப்பு தொடங்கியதும் தெரிந்ததே.

இதனை அடுத்து ஒரே ஸ்டூடியோவில் அருகருகே உள்ள செட்களில் விஜய் மற்றும் கார்த்தி படங்களின் படப்பிடிப்பு நடைபெறுவதால் இருவரும் சந்திக்க வாய்ப்பு இருப்பதாக வெளிவந்த செய்தியை ஏற்கனவே பார்த்தோம்.

இந்த நிலையில் ’சர்தார்’ படப்பிடிப்பின் இடையே கார்த்தி அந்த படத்தின் கெட்டப்புடன் விஜய்யை நேரில் சென்று சந்தித்ததாகவும் அப்போது விஜய் அவரை வரவேற்று கட்டியணைத்து தனது மகிழ்ச்சியை வெளிப்படுத்தியதாகவும் தகவல்கள் வெளிவந்துள்ளன. மேலும் கார்த்தியின் புதிய கெட்டப்பை பார்த்து ஆச்சரியம் அடைந்த விஜய், இந்த கெட்டப் சூப்பராக இருக்கிறது என்றும் உங்களுக்கும் உங்கள் படக்குழுவினருக்கும் தனது வாழ்த்துக்கள் என்றும் தெரிவித்ததாகவும் செய்திகள் வெளியாகி உள்ளது.

இந்த தகவலை விஜய் மற்றும் கார்த்தி ரசிகர்கள் சமூக வலைத்தளங்களில் பகிர்ந்து வருகின்றனர் என்பது குறிப்பிடத்தக்கது.