பிரபல நடிகர் கார்த்தி நடிப்பில் பிஎஸ் மித்ரன் இயக்கத்தில் உருவாகி வரும் ‘சர்தார்’ படத்தின் படப்பிடிப்பு கடந்த சில மாதங்களாக நடைபெற்று வருகிறது. சமீபத்தில் இந்த படத்தின் முக்கிய காட்சிகள் அஜர்பைஜான் நாட்டில் படமாக்கப்பட்டதாகவும் முதன்முதலாக தமிழ் சினிமாவில் தான் அஜர்பைஜான் நாட்டின் பாராளுமன்றத்தில் படப்பிடிப்பு நடந்ததாகவும் செய்திகள் வெளியானது.

இந்த நிலையில் தற்போது அஜர்பைஜான் படப்பிடிப்பை முடித்துவிட்டு இந்தியா திரும்பியுள்ள படக்குழுவினர் அடுத்த கட்டமாக பாண்டிச்சேரியில் படப்பிடிப்பு நடத்தி வருவதாக தகவல் வெளியாகி உள்ளன. இன்னும் இரண்டு வாரங்கள் இந்த படத்தின் படப்பிடிப்பு பாண்டிச்சேரியில் நடைபெறும் என்றும் பாண்டிச்சேரியில் தான் இந்த படத்தின் பிரம்மாண்டமான கிளைமாக்ஸ் படமாக்கப்பட உள்ளதாகவும்,. இதனை அடுத்து ஜூலை முதல் வாரத்தில் இந்த படத்தின் ஒட்டுமொத்த படப்பிடிப்பும் முடிந்து விடும் என்றும் கூறப்படுகிறது.

கார்த்தி இரட்டை வேடத்தில் நடித்து இருப்பதாக கூறப்படும் இந்த படத்தில் நடிகை ராஷி கண்ணா, ரஜிஷா விஜயன் உள்பட பலர் நடித்துள்ளனர் என்பதும் 2000ஆம் ஆண்டுகளின் நாயகியான நடிகை லைலா இந்த படத்தில் முக்கிய கேரக்டரில் நடித்திருக்கிறார் என்பதும் குறிப்பிடத்தக்கது.

ஏற்கனவே கார்த்தி நடித்த ‘விருமன்’ திரைப்படம் சுதந்திர தின விடுமுறை தினத்திலும், ’பொன்னியின் செல்வன்’ வரும் செப்டம்பர் 30ஆம் தேதியும் ரிலீஸ் ஆக உள்ள நிலையில் விரைவில் ‘சர்தார்’ படத்தின் ரிலீஸ் தேதியும் அறிவிக்கப்படும் என்று எதிர்பார்க்கப்படுகிறது.