నిన్న కర్ణాటక సీఎం యడియూరప్పకు కరోనా పాజిటివ్‌గా నిర్ధారణ కాగా.. నేడు కర్ణాటక మాజీ ముఖ్యమంత్రి, కాంగ్రెస్ సీనియర్ నాయకుడు సిద్ధరామయ్యకు కరోనా సోకింది. కరోనా లక్షణాలు కనిపించడంతో ఆయన సోమవారం పరీక్ష చేయించుకోగా కరోనాగా నిర్ధారణ అయింది. ఈ విషయాన్ని ఆయన స్వయంగా ట్విట్టర్ వేదికగా వెల్లడించారు. వైద్యుల సలహా మేరకు తాను ఆసుపత్రిలో చేరానని సిద్దరామయ్య వెల్లడించారు. ఇటీవల తనను కలిసిన వారంతా క్వారంటైన్‌కు వెళ్లాలని సిద్ధరామయ్య సూచించారు.

‘నాకు కొవిడ్-19 పాజిటివ్‌గా పరీక్షల్లో నిర్ధారణ అయింది. వైద్యుల సలహాపై నేను ముందుజాగ్రత్త చర్యగా ఆసుపత్రిలో చేరాను. నన్ను కలిసిన వారందరూ, కరోనా లక్షణాలున్న వారు క్వారంటైన్‌కి వెళ్లండి’ అంటూ సిద్ధరామయ్య ట్వీట్ చేశారు. దీనికి ఒక్కరోజు ముందే కర్ణాటక సీఎం యడియూరప్పకు కూడా కరోనా పాజిటివ్‌గా నిర్ధారణ అయిన విషయం తెలిసిందే. ప్రస్తుతం ఆయన బెంగుళూరులోని ఓ ఆసుపత్రిలో చికిత్స పొందుతున్నారు. సీఎం, మాజీ సీఎంలిద్దరికీ కరోనా పాజిటివ్‌గా నిర్ధారణ కావడంతో వారిని కలిసిన వారు ఆందోళనకు గురవుతున్నారు.