சமீபத்தில் முதல்வருக்கு எதிராக சர்ச்சைக்குரிய கருத்தை கூறியதால் கைது செய்யப்பட்டு பின்னர் ஜாமீனில் வெளிவந்துள்ள எம்.எல்.ஏ மற்றும் நடிகர் கருணாஸ், கடந்த வாரம் உடல்நலக்குறைவு காரணமாக சென்னை வடபழனியில் உள்ள ஒரு தனியார் மருத்துவமனையில் அனுமதிக்கப்பட்டார். நேற்று அவர் உடல்நலம் தேறியதை அடுத்து டிஸ்சார்ஜ் ஆனார்.

இந்த நிலையில் இன்று காலை சென்னை கோபாலபுரத்தில் உள்ள திமுக தலைவர் ஸ்டாலினின் இல்லத்திற்கு சென்று அவரை சந்தித்த கருணாஸ், தான் சிறையில் இருந்தபோது தனக்கு ஆதரவு கொடுத்த திமுக தலைவருக்கு நன்றி கூறவே சந்தித்ததாக கூறினார்.

இந்த நிலையில் சற்றுமுன் அமமுக துணை பொதுச்செயலாளர் டிடிவி தினகரனையும் அவரது இல்லத்தில் கருணாஸ் சந்தித்து பேசியுள்ளார். கருணாஸை மு.க.ஸ்டாலினும், தினகரனும் பின்னால் இருந்து இயக்குவதாக அதிமுகவினர் குற்றஞ்சாட்டி வரும் நிலையில் இன்று ஒரே நாளில் ஸ்டாலின், தினகரன் ஆகிய இருவரையும் கருணாஸ் சந்தித்திருப்பது தமிழக அரசியலில் பெரும் பரபரப்பை ஏற்படுத்தியுள்ளது.