ఇండియ‌న్ సినిమాల్లో బ‌యోపిక్స్ ట్రెండ్ కొన‌సాగుతోంది. రాజ‌కీయ‌, సినీ, క్రీడ‌లు స‌హా ప‌లు రంగాల్లో అత్యున్న‌త సేవ‌లు అందించిన ప‌లువురి జీవిత చ‌రిత్ర‌లు వెండితెర‌పై ఆవిష్కత‌మ‌వుతున్నాయి.

మ‌రికొన్ని చ‌ర్చ‌ల ద‌శ‌లో ఉన్నాయి. ఈ నేప‌థ్యంలో 2000లో జ‌రిగిన ఒలింపిక్స్ వెయిట్ లిఫ్టింగ్ విభాగంలో కాంస్య ప‌త‌కం సాధించ‌డ‌మే కాకుండా ఒలింపిక్స్‌లో ప‌తకం సాధించిన తొలి భార‌తీయ మ‌హిళగా రికార్డ్ క్రియేట్ చేసిన క‌ర‌ణం మ‌ల్లీశ్వ‌రి జీవితాన్ని సినిమా రూపంలో ఆవిష్క‌రించ‌నున్నారు. ఎంతో మంది మ‌హిళ‌ల‌కు స్ఫూర్తినిచ్చిన క‌ర‌ణం మ‌ల్లీశ్వ‌రి బ‌యోపిక్‌ను పాన్ ఇండియా మూవీగా రూపొందించ‌నున్నారు. ప్ర‌ముఖ నిర్మాణ సంస్థ‌లు ఎం.వి.వి.సినిమా, కె.ఎఫ్‌.సి బ్యాన‌ర్స్‌పై సంజ‌నా రెడ్డి ఈ బయోపిక్‌ను తెర‌కెక్కించ‌నున్నారు. ఎం.వి.వి.స‌త్య‌నారాయ‌ణ‌, కోన‌వెంక‌ట్ నిర్మాత‌లు.

నేడు(జూన్ 1న) క‌ర‌ణం మ‌ల్లీశ్వ‌రి పుట్టిన‌రోజు. ఈ సంద‌ర్భంగా చిత్ర నిర్మాత‌లు అధికారికంగా ప్రాజెక్ట్‌ను అనౌన్స్ చేశారు. మ‌రి క‌ర‌ణం మ‌ల్లీశ్వ‌రి పాత్ర‌లో ఎవ‌రు న‌టిస్తార‌నే ది ఆస‌క్తికరంగా మారింది. ఇందులో బాలీవుడ్ హీరోయిన్ న‌టిస్తుందా?  లేక టాలీవుడ్ హీరోయిన్ న‌టిస్తుందా? అని తెలియాలంటే కొన్నిరోజులు ఆగాల్సిందే. త్వ‌ర‌లోనే ఈ చిత్రంలో న‌టించ‌బోయే న‌టీన‌టులు, సాంకేతిక నిపుణుల వివ‌రాల‌ను ప్ర‌క‌టించనున్నారు.