కన్నడ సినీ పరిశ్రమలో మరో విషాదం చోటుచేసుకుంది. సీనియర్‌ నటి మాలా శ్రీ భర్త, నిర్మాత కొణిగల్ రాము(52) కరోనాతో కన్నుమూశారు. గత వారం ఆయనకు కరోనా సోకగా వెంటనే చికిత్స నిమిత్తం బెంగుళూరులోని ఓ ప్రైవేటు ఆసుపత్రిలో చేరారు. సోమవారం ఆయన పరిస్థితి విషమించడంతో సాయంత్రం ఆయన మరణించారని ఆసుపత్రి వర్గాలు వెల్లడించాయి. ఎన్నో సూపర్ హిట్ చిత్రాలను నిర్మించి కొణిగల్‌ రాము కన్నడ సినీ ఇండస్ర్టీలో ప్రొడ్యూసర్‌గా మంచి స్థానం ఏర్పరుచుకున్నారు.

అప్పట్లో స్టార్‌ హీరోయిన్‌గా గుర్తింపు తెచ్చుకున్న నటి మాలాశ్రీని కొణిగల్ రాము వివాహం చేసుకున్నారు. వీరికి ఒక కుమారుడు, కుమార్తె ఉన్నారు. కొణిగల్‌ రాము ఎక్కువగా భారీ బడ్జెట్ సినిమాలను తెరకెక్కించారు. కోట్లాది రూపాయలతో సినిమాలను తెరకెక్కిస్తారు కాబట్టే ఆయనను కన్నడ నాట ‘కోటి రాము’ అని పిలుస్తారు. దాదాపు ఆయన 39 సినిమాలకు ఇండస్ట్రీకి అందించారు. శాండల్‌ వుడ్‌లో ఏకే 47, లాకప్‌ డెత్‌, సీబీఐ దుర్గ వంటి ఎన్నో సూపర్‌ హిట్‌ చిత్రాలను నిర్మించిన ఘనత రాముదే. కొణిగల్‌ రాము మృతిపై కన్నడ సినీ పరిశ్రమ దిగ్భ్రాంతికి లోనైంది. కొణిగల్ రాముకు పలువురు సినీ ప్రముఖులు సంతాపం వ్యక్తం చేశారు.