பிரபல நடிகர் மறைவு: ரஜினிகாந்த் இரங்கல்
- IndiaGlitz, [Sunday,November 25 2018]
பிரபல கன்னட நடிகரும் முன்னாள் அமைச்சருமான அம்பரிஷ் நேற்று காலமானார். அவருக்கு வயது 66. கடந்த சில நாட்களாக உடல்நலமின்றி இருந்து நடிகர் அம்ரிஷ் நேற்று சிகிச்சையின் பலனின்றி காலமானதாக அறிவிக்கப்பட்டது.
சூப்பர் ஸ்டார் ரஜினிகாந்த் அவர்களின் நெருங்கிய நண்பரக்ளில் ஒருவராகிய அம்பரிஷ், கன்னட திரையுலகில் ரிபெல் ஸ்டார் என்று அழைக்கப்பட்டார். நடிகை சுமலதா இவரது மனைவி என்பதும் இவர்களுக்கு அபிஷேக் என்ற மகன் இருக்கின்றார் என்பதும் குறிப்பிடத்தக்கது.
கடந்த 1952ஆம் ஆண்டு மே 29ஆம் தேதி மாண்டியா மாவட்டத்தில் பிறந்த அம்பரீஷ், 1972ஆம் ஆண்டு கன்னட திரையுலகில் நுழைந்து பல வெற்றி படங்களில் நடித்தார். சுமார் 200 படங்கள் நடித்துள்ள அம்பரீஷ், மாநில அரசு விருதுகள் உள்பட பல விருதுகளை பெற்றுள்ளார். காங்கிரஸ் கட்சியை சேர்ந்த அம்பரீஷ், சித்தராமையா மந்திரிசபையில் கேபினட் மந்திரியாக பதவி வகித்தவர் என்பது குறிப்பிடத்தக்கது.
அம்பரீஷின் மறைவுக்கு நடிகர் ரஜினிகாந்த் வெளியிட்டுள்ள இரங்கல் செய்தியில் கூறியிருப்பதாவது: 'நல்ல மனிதநேயமுள்ளவர், எனது நெருங்கிய நண்பர் அம்பரீஷ் அவர்களை நான் இழந்து விட்டேன். அவரது ஆத்மா சாந்தி அடைய இறைவனை வேண்டுகிறேன்' என்று தெரிவித்துள்ளார்.