తన సినిమాలతో వరుస విజయాలు అందుకుంటూ విలక్షణ నటిగా పేరు సంపాదించుకున్న హీరోయిన్‌ కంగనా రనౌత్‌. ప్రస్తుతం ఈమె అయోధ్యపై ఓ సినిమాలో నటించబోతున్నారు. ఇటీవల రామమందిరం గురించి సుప్రీంకోర్టు సంచలనాత్మకమైన తీర్పును వెలువరిచిన సంగతి తెలిసిందే. ఈ నేపథ్యంలో కంగనా రనౌత్‌ ‘అపరాజిత అయోధ్య’ పేరుతో ఓ సినిమాను రూపొందించబోతున్నట్లు ప్రకటించింది.

దీనికి సంబంధించిన కథ తయారవుతుందని, బాహుబలి కథా రచయిత విజయేంద్ర ప్రసాద్‌ ఈ కథను సిద్ధం చేస్తున్నట్లు ఆమె తెలిపారు. అసలు రామమందిరంపైనే ఎందుకు సినిమా తీయాలనుకుంటున్నారు? అని ప్రశ్నించగా, అయోధ్య కేసు దేశ రాజకీయాలనే మార్చింది. మన దేశంలో చాలా కీలకంగా మారింది. అలాంటి ఓ కథాంశంతో ఓ నాస్తికుడు భక్తుడిగా ఎలా మారాడనే కథాంశంతో ‘అపరాజిత అయోధ్య’ రూపొందుతుందని కంగనా తెలిపారు. రాణీ ఆఫ్‌ ఝాన్సీ పేరుతో ఈ సినిమాను తనే నిర్మించబోతున్నట్లు కూడా ఆమె తెలియజేశారు. ఈ సినిమాలో తన వ్యక్తిగత జీవితం కూడా కనపడుతుందని ఈ సందర్భంగా ఆమె తెలిపారు.

కంగనా రనౌత్‌ ప్రస్తుతం జయలలిత బయోపిక్‌ ‘తలైవి’లో టైటిల్‌ పాత్రలో నటించబోతున్నారు. ఈ సినిమాకు సంబంధించి ఆమె ఫస్ట్‌లుక్‌, టీజర్‌ను చిత్ర యూనిట్‌ విడుదల చేసింది. ఈ చిత్రం జూన్‌ 26న విడుదల కానుంది.