తమిళం, తెలుగులో బ్లాక్‌బస్టర్‌ విజయం అందుకున్న ‘కాంచన-3’ సినిమా బాలీవుడ్‌లో రీమేక్‌గా రాబోతున్న సంగతి తెలిసిందే. ఈ హర్రర్ సినిమా రాఘవ లారెన్స్‌కు మంచి పేరు తెచ్చిపెట్టిందని చెప్పుకోవచ్చు. బాలీవుడ్ స్టార్లు సైతం ఈ సినిమా పట్ల ఆసక్తి చూపేలా చేసిందంటే లారెన్స్ రేంజ్‌ ఏంటో అర్థం చేసుకోవచ్చు.

ఈ చిత్రాన్ని హిందీలో 'లక్ష్మీ బాంబ్' పేరుతో రీమేక్ చేస్తున్నారు. ఈ మూవీలో స్టార్ హీరో అక్షయ్ కుమార్ లీడ్ రోల్ చేస్తున్నారు. ఇందుకు సంబంధించి షూటింగ్ ఇటీవలే ముంబైలో మొదలైంది. తాజాగా ఈ చిత్రానికి సంబంధించి లారెన్స్ ట్విట్టర్ వేదికగా అప్‌డేట్ అందించారు.

లారెన్స్ ట్వీట్..

"మిత్రులు, అభిమానులకు హాయ్..'కాంచన' హిందీ రీమేక్ సినిమా షూటింగ్ మొదలైంది. ఈ చిత్రంలో ద గ్రేట్ అక్షయ్ కుమార్ సార్ నటిస్తున్నారు. ఈ చిత్రానికి మీ అందరి ఆశీస్సులు కావాలి.. " అని లారెన్స్ ట్విట్టర్‌లో కోరారు. ఈ ట్వీట్‌కు లక్ష్మీబాంబ్ అని ట్యాగ్ చేశారు.

లారెన్స్ ట్వీట్‌కు పలువురు నటీనటులు, అభిమానులు పెద్ద ఎత్తున కామెంట్స్ చేస్తున్నారు. ఈ చిత్రం హిందీలో కూడా సూపర్ డూపర్ హిట్ అవుతుంది.. అంటూ కామెంట్స్ చేస్తున్నారు. కాగా తెలుగు, తమిళ భాషల్లో మెప్పించిన ఈ మూవీ హిందీలో ఏ మాత్రం మెప్పిస్తుందో వేచి చూడాల్సిందే మరి.