உலகநாயகன் கமலஹாசன் ஏற்கனவே ’இந்தியன்’ படத்தின் இரண்டாம் பாகமான ’இந்தியன் 2’ என்ற படத்தில் நடித்து வருகிறார் என்பது தெரிந்ததே. இந்த படத்தின் படப்பிடிப்பு தற்காலிகமாக நிறுத்தி வைக்கப்பட்டிருந்தாலும் அடுத்தகட்ட படப்பிடிப்பு விரைவில் தொடங்கும் என்று எதிர்பார்க்கப்படுகிறது.

இந்த நிலையில் கடந்த 1992ஆம் ஆண்டு வெளிவந்த ’தேவர்மகன்’ படத்தின் இரண்டாம் பாகமாக ’தலைவன் இருக்கின்றான்’ என்ற படம் உருவாக இருப்பதாகவும் இந்த படத்தின் படப்பிடிப்பு ’இந்தியன் 2’ படத்தின் படப்பிடிப்பு முடிந்தவுடன் தொடங்கும் என்றும் கூறப்படுகிறது. கமலஹாசனே இயக்கும் இந்தப் படத்தில் வடிவேல் உள்பட ஒருசிலர் நடிக்க ஏற்கனவே ஒப்பந்தம் செய்யப்பட்டு உள்ளனர் என்பது தெரிந்ததே.

இந்த நிலையில் கமலஹாசன் நடிப்பில் கௌதம் மேனன் இயக்கிய சூப்பர் ஹிட் திரைப்படமான ’வேட்டையாடு விளையாடு’ படத்தின் இரண்டாம் பாகமும் விரைவில் தயாராக இருப்பதாக செய்திகள் வெளியாகியுள்ளது. சமீபத்தில் ’ஜிப்ஸி’படத்தை பார்த்த கமல்ஹாசன், பட குழுவினருக்கும் வாழ்த்து தெரிவித்தபோது தயாரிப்பாளர் ஐசரி கணேஷ் மற்றும் கௌதம்மேனன் ஆகியோர் கமலஹாசனை சந்தித்து பேசியுள்ளனர். ‘வேட்டையாடு விளையாடு 2’ படம் குறித்து தான் இவர்கள் மூவரும் பேசியதாகவும் விரைவில் இதுகுறித்த அறிவிப்பு வெளிவரும் என்றும் கூறப்படுகிறது.

கடந்த 2006ஆம் ஆண்டு வெளியான ’வேட்டையாடு விளையாடு’ திரைப்படம் மிகப் பெரிய வெற்றி பெற்ற திரைப்படம் என்பதால் இந்த படத்தின் இரண்டாம் பாகத்தை கமல் ரசிகர்கள் மிகுந்த ஆவலுடன் எதிர்பார்த்து காத்திருக்கின்றனர் என்பது குறிப்பிடத்தக்கது.