நடைபெற்று முடிந்த மக்களவை மற்றும் 18 சட்டமன்ற இடைத்தேர்தலில் கமல்ஹாசனின் மக்கள் நீதி மய்யம் கட்சி தனித்து போட்டியிட்ட நிலையில் தேர்தல் பிரச்சார கூட்டங்களில் அதிமுகவை எந்த அளவுக்கு கமல் விமர்சனம் செய்தாரோ அதே அளவுக்கு திமுகவை விமர்சனம் செய்தார். இந்த நிலையில் தற்போது திமுக எடுத்த நடவடிக்கை ஒன்றுக்கு கமல்ஹாசன் திடீரென ஆதரவு தெரிவித்துள்ளார்.

அதிமுக எம்எல்ஏக்கள் ரத்தினசபாபதி, கலைச்செல்வன், பிரபு ஆகியோர் அமமுக கட்சியில் பொறுப்பில் இருப்பதாக அதிமுக கொறடா ராஜேந்திரன் சபாநாயகர் தனபால் அவர்களிடம் புகார் அளித்திருந்த நிலையில் இதுகுறித்து 3 எம்எல்ஏக்களிடம் விளக்கம் கேட்டு சபாநாயகர் தனபால் நோட்டீஸ் அனுப்பியுள்ளார்.

இந்த நிலையில் சபாநாயகரின் இந்த நடவடிக்கைக்கு எதிர்ப்பு தெரிவித்து அவர் மீது நம்பிக்கையில்லா தீர்மானம் கொண்டு வர திமுக முடிவு செய்துள்ளது. சபாநாயகர் மீது நம்பிக்கை இல்லா தீர்மானம் கொண்டு வரும் திமுகவின் செயல்பாட்டுக்கு, கமல்ஹாசன் ஆதரவு தெரிவித்துள்ளார்.