உலக நாயகன் கமல்ஹாசன் நடிக்கும் அடுத்த படத்தின் தொடக்கவிழா மற்றும் டைட்டில் அறிவிப்பு விழா இன்று நடிகர் சங்கத்திற்கு சொந்தமான இடத்தில் நடைபெற்றது. இந்த விழா புதிய நடிகர் சங்கம் பொறுப்பேற்றவுடன் நடைபெறும் முதல் விழா என்பது குறிப்பிடத்தக்கது. இந்த விழா நடத்துவதற்கான தொகையை கமல், பொருளாளர் கார்த்தியிடம் காசோலையாக வழங்கினார்.

பின்னர் இந்த படத்தின் டைட்டில் முறைப்படி அறிவிக்கப்பட்டது. தமிழ், மற்றும் தெலுங்கில் 'சபாஷ் நாயுடு' என்ற டைட்டிலும், இந்தியில் 'Sabaash Kundu' என்று டைட்டிலும் வைக்கப்பட்டுள்ளது. இந்த படத்தின் தமிழ் டைட்டிலை இந்த படத்தின் இசையமைப்பாளர் இசைஞானி இளையராஜா பரிந்துரை செய்திருந்தார் என்பது குறிப்பிடத்தக்கது.

'தசாவதாரம்' பல்ராம் நாயுடு கேரக்டரில் கமல்ஹாசனும், அவருக்கு ஜோடியாக ரம்யாகிருஷ்ணனும், மகளாக ஸ்ருதிஹாசனும் நடிக்கவுள்ளனர். கமல்ஹாசன் உடன் பயணிக்கும் முக்கிய காமெடி கேரக்டரில் பிரம்மானந்தம் நடிக்கவுள்ளார்.

கமல்ஹாசன், ஊர்மிளா நடித்த 'சாணக்கியன்' என்ற மலையாள படத்தை இயக்கிய ராஜீவ்குமார் இந்த படத்தை இயக்குகிறார். இந்த படத்தின் மூன்று மொழி ஃபர்ஸ்ட்லுக்கையும் கமல் இன்றைய விழாவில் வெளியிட்டுள்ளார் என்பது குறிப்பிடத்தக்கது.