நடிகர் கமல்ஹாசன் இன்னும் இரண்டு நாட்களில் அரசியல் கட்சியை ஆரம்பிக்கவுள்ள நிலையில் அவர் பல அரசியல் கட்சி தலைவர்களையும் முன்னாள் ஐஏஎஸ் அதிகாரிகளையும் சந்தித்து வருகிறார். அந்த வகையில் இன்று சற்றுமுன்னர் அவருடைய நெருங்கிய நண்பர்களில் ஒருவரான ரஜினிகாந்த் அவர்களை அவரது போயஸ் தோட்ட இல்லத்தில் சந்தித்தார்

இந்த சந்திப்பு குறித்து கமல்ஹாசன் கூறியபோது, 'என் வாழ்க்கையில் ஒரு முக்கியமான பயணம் இது. இதை எனக்கு நெருங்கியவர்கள் அனைவரிடம் சொல்லி கொண்டு வருகிறேன். அந்த வகையில் எனது நெருங்கிய நண்பரான ரஜினியிடமும் சொல்லி கொள்ளவே அவரை சந்தித்தேன்.

இந்த சந்திப்பு முழுக்க முழுக்க நட்பு ரீதியிலானது. இதில் அரசியல் எதுவும் இல்லை. எனது கட்சியின் தொடக்கவிழாவிற்கு ரஜினிக்கு அழைப்பு விடுத்துள்ளேன். வருவதும், வராததும் அவர் எடுக்கும் முடிவு' என்று கூறியுள்ளார்.

ரஜினியும் மிக விரைவில் கட்சி ஆரம்பிக்கவுள்ள நிலையில் கமல்-ரஜினியின் இந்த சந்திப்பு பெரும் பரபரப்பை ஏற்படுத்தியுள்ளது.