போராட்டம் நடத்தி திரும்பி வந்த விவசாயிகளை வரவேற்ற ஒரே அரசியல் தலைவர்
- IndiaGlitz, [Sunday,December 02 2018]
பல்வேறு கோரிக்கைகளை வலியுறுத்தி டெல்லியில் நேற்று தமிழக விவசாயிகள் உள்பட இந்தியாவின் அனைத்து பகுதியில் உள்ள விவசாயிகளும் போராட்டம் செய்தனர். இந்த போராட்டம் காரணமாக நேற்று டெல்லியே ஸ்தம்பித்தது. குறிப்பாக தமிழக விவசாயிகள் சிலர் நடத்திய நிர்வாண போராட்டம் பெரும் பரபரப்பை ஏற்படுத்தியது.
இந்த நிலையில் டெல்லி போராட்டத்தை முடித்துவிட்டு இன்று சென்னை திரும்பிய விவசாயிகளை மக்கள் நீதி மய்யம் கட்சியின் தலைவர் கமல்ஹாசன் வரவேற்றார். விவசாயிகளை வரவேற்ற ஒரே அரசியல் தலைவர் கமலுக்கு விவசாயிகள் நன்றி தெரிவித்து கொண்டனர். பின்னர் சென்னை எழும்பூர் ரயில் நிலையத்தில் போராட்டம் நடத்திய அய்யாக்கண்ணு தலைமையிலான விவசாயிகளை சந்தித்த பின் கமல் செய்தியாளர்களிடம் கூறியபோது, 'விவசாயிகளுடன் சேர்ந்து அரசுக்கு அறவழியில் அழுத்தம் கொடுப்பேன் என்று கூறினார்.
மேலும் கஜா புயல் நிவாரண பணிகளை அரசு சரியாக செய்யவில்லை என கூறுவதை எதிர்க்கட்சியின் குரலாக பார்க்காமல், மக்களின் குரலாக பார்க்க வேண்டும் என்றும் கமல் கேட்டுக்கொண்டார்.