நடிகர் திலகம் சிவாஜி கணேசன் பேரனும் ராம்குமாரின் மகனுமாகிய துஷ்யந்த் 'ஈஷான் புரடொக்ஷன்ஸ்' என்ற புதிய நிறுவனத்தை தொடங்கி அதன் மூலம் 'மீன் குழம்பும் மண் பானையும்' என்ற படத்தை தயாரித்து வருவது குறித்த தகவல்களை ஏற்கனவே பகிர்ந்திருந்தோம். மேலும் இந்த படத்தில் உலக நாயகன் கமல்ஹாசன் சிறப்பு தோற்றத்திலும் நடிக்கவுள்ளதாகவும் தெரிவித்திருந்தோம்.

இந்நிலையில் இன்று இந்த படத்தின் படப்பிடிப்பில் கமல்ஹாசன் கலந்து கொண்டுள்ளதாக புகைப்படத்துடன் கூடிய தகவல் தற்போது வெளியாகியுள்ளது. ஆனால் கமல்ஹாசனுக்கு இந்த படத்தில் என்ன கேரக்டர் என்பது குறித்த தகவல் இதுவரை வெளிவரவில்லை.

பிரபு, காளிதாஸ் ஜெயராம், ஆஸ்னா ஜாவேரி, பூஜா குமார், எம்.எஸ்.பாஸ்கர் உள்பட பலர் நடித்து வரும் இந்த படத்தின் மலேசிய படப்பிடிப்பு சமீபத்தில் முடிவடைந்தது. டி.இமான் இசையமைக்கும் இந்த படத்தை அமுதேஸ்வர் என்பவர் இயக்கி வருகிறார். லக்ஷ்மண் குமார் ஒளிப்பதிவாளராகவும் கெவின் படத்தொகுப்பாளராகவும் இந்த படத்தில் பணிபுரிந்து வருகின்றனர்.