உலகநாயகன் கமல்ஹாசன் நடித்த ’இந்தியன் 2’ திரைப்படம் நேற்று வெளியான நிலையில் இந்த படத்திற்கு பெரும்பாலும் கலவையான விமர்சனங்கள் வந்து கொண்டிருக்கின்றன என்பதை பார்த்து வருகிறோம். இந்த நிலையில் இந்த படத்தின் முதல் நாள் வசூல் குறித்த தகவல் தற்போது இணையத்தில் வெளியாகி வைரலாகி வருகிறது.

‘இந்தியன் 2’ திரைப்படம் உலகம் முழுவதும் 5000க்கும் மேற்பட்ட திரையரங்குகளில் வெளியானதாக கூறப்பட்டது. குறிப்பாக தமிழ்நாட்டில் மட்டும் 700 திரையரங்குகளில் வெளியானது என்று கூறப்பட்டது.

மேலும் இந்த படத்தின் முன்பதிவு வசூல் மட்டுமே கிட்டத்தட்ட 20 கோடி ரூபாய் என்று கூறப்பட்ட நிலையில் இந்த படத்தின் முதல் நாள் 55 கோடி மட்டுமே வசூல் செய்துள்ளதாக தகவல் வெளியாகி உள்ளன.

கமல்ஹாசனின் முந்தைய படமான ’விக்ரம்’ திரைப்படம் முதல் நாளில் உலகம் முழுவதும் 65 கோடி ரூபாய் வசூல் செய்ததாக கூறப்பட்ட நிலையில் அதை விட 10 கோடி குறைவாகவே ’இந்தியன் 2’ படம் வசூல் செய்துள்ளது என்பது குறிப்பிடத்தக்கது.

இருப்பினும் இன்றும் நாளையும் இந்த படம் கிட்டத்தட்ட ஹவுஸ்புல் காட்சிகளாக அனைத்து திரையரங்களிலும் ஓடி வருவதால் வெள்ளி சனி ஞாயிறு ஆகிய மூன்று நாட்களில் 200 கோடி ரூபாய் வரை வசூல் செய்ய வாய்ப்பு இருப்பதாக கூறப்படுகிறது.

’இந்தியன் 2’ படத்தின் பட்ஜெட் சுமார் 300 கோடி என்று கூறப்படும் நிலையில் போட்ட முதலீடு தயாரிப்பு நிறுவனத்திற்கு கிடைக்குமா என்பதையும் பொறுத்திருந்துதான் பார்க்க வேண்டும்.