உலகநாயகன் கமல்ஹாசன் நடிப்பில், மணிரத்னம் இயக்கத்தில் உருவாகி வரும் ‘தக்லைஃப்’ படத்தின் படப்பிடிப்பு கடந்த சில வாரங்களாக நடைபெற்று வரும் நிலையில் தற்போது டெல்லியில் இந்த படத்தின் படப்பிடிப்பு நடந்து வருவதாக செய்திகள் வெளியானது.

கடந்த சில வாரங்களாக தேர்தல் பணி காரணமாக ‘தக்லைஃப்’ படத்தின் படப்பிடிப்பில் கமல்ஹாசன் கலந்து கொள்ளாத நிலையில் அவர் இல்லாத காட்சிகளின் படப்பிடிப்பு நடந்ததாகவும் கூறப்பட்டது. இந்த நிலையில் தேர்தல் பணி முடிந்தவுடன் ‘தக்லைஃப்’ படத்திற்காக ஒரு பாடலை எழுதி முடித்த கமல்ஹாசன் தற்போது இந்த படத்தின் படப்பிடிப்பிற்காக டெல்லி சென்றுள்ளதாகவும் அவர் சம்பந்தப்பட்ட காட்சிகளின் படப்பிடிப்பு இன்று முதல் தொடங்க இருப்பதாகவும் தெரிகிறது.

மேலும் டெல்லி படப்பிடிப்பின் போது கமல்ஹாசனுடன் இருக்கும் புகைப்படம் தற்போது இணையத்தில் கசிந்து உள்ள நிலையில் அந்த புகைப்படத்தில் கமல்ஹாசன் உடன் சிம்பு ,மிர்சாபூர் நடிகர் அலி ஃபைசல், நாசர், நடிகர் வையாபுரி உள்ளிட்டோர் இருக்கும் நிலையில் இவர்களுடன் தான் இன்றைய படப்பிடிப்பு நடைபெறும் என்றும் தெரிகிறது. அது மட்டுமின்றி இந்த புகைப்படத்தின் மூலம் கமல்ஹாசனின் கெட்டப் கசிந்து உள்ளது என்பது குறிப்பிடத்தக்கது.

மேலும் இந்த படத்தில் சிம்பு இணைந்ததை அடுத்து அது குறித்த பிரமோ வீடியோ இன்று மாலை வெளியாகும் என்று எதிர்பார்க்கப்படுவதால் இன்று ரசிகர்களுக்கு ஒரு சர்ப்ரைஸ் இருக்கிறது என்றும் செய்திகள் வெளியாகிக் கொண்டிருக்கின்றன.

இசைப்புயல் ஏஆர் ரகுமான் இசையில், ரவி கே சந்திரன் ஒளிப்பதிவில், ஸ்ரீதர் பிரசாத் படத்தொகுப்பில் உருவாகி வரும் இந்த படம் ராஜ்கமல் ஃபிலிம் இண்டர்நேஷனல், மெட்ராஸ் டாக்கீஸ் மற்றும் ரெட் ஜெயண்ட் மூவிஸ் நிறுவனங்களின் தயாரிப்பில் உருவாகி வருகிறது.