கடந்த 1989ஆம் ஆண்டு கமல்ஹாசன், ஜெயராம், திலகன், ஊர்மிளா மற்றும் பலர் நடித்த மலையாள த்ரில் திரைப்படம் 'சாணக்யன். இந்த படத்தை இயக்கிய டி.கே.ராஜீவ்குமார், 26 வருடங்கள் கழித்து மீண்டும் கமல்ஹாசன் படம் ஒன்றை இயக்கவுள்ளதாக கூறப்படுகிறது.

தமிழ், மலையாளம் ஆகிய இருமொழிகளில் உருவாகவுள்ள இந்த படம் ஒரு முழுநீள காமெடி படம் என்று கூறப்படுகிறது. மெளலி திரைக்கதையில் ராஜேஷ் எம்.செல்வா இயக்கத்தில் உருவாகவுள்ள காமெடி திரைப்படத்திற்கு முன்னரே டி.கே.ராஜீவ்குமார், இயக்கத்தில் கமல் நடிக்கவுள்ளதாகவும், இதுகுறித்த அறிவிப்பு விரைவில் வரும் என்றும் கூறப்படுகிறது.

'சாணக்யன்' படத்தில் இயக்குனராக அறிமுகமான டி.கே.ராஜீவ்குமார் இந்தியாவின் முதல் 3D திரைப்படம் என்ற புகழ்பெற்ற 'மை டியர் குட்டிச்சாத்தான்' படத்தில் உதவி இயக்குனராக பணிபுரிந்தவர் என்பது குறிப்பிடத்தக்கது. மேலும் இவர் இயக்கிய Jalamarmaram என்ற மலையாள திரைப்படத்திற்கு தேசிய விருதும் கிடைத்தது என்பது குறிப்பிடத்தக்கது. ஏற்கனவே மூன்று தேசிய விருதுகள் பெற்றுள்ள கமல்ஹாசன், தேசிய விருது பெற்ற இயக்குனருடன் இணையவுள்ளதால் இந்த படம் பெரும் எதிர்பார்ப்பை ஏற்படுத்தும் என்பதில் ஐயமில்லை.