3டி மற்றும் டால்பி தொழில்நுட்பத்தில் ரிலீசாகும் கமல் படம்: ரசிகர்கள் ஆர்வம்
- IndiaGlitz, [Sunday,July 10 2022]
20 வருடங்களுக்கு முன் வெளியான கமல்ஹாசனின் படம் 3டி மற்றும் டால்பி தொழில்நுட்பத்தில் வெளியிட படக்குழுவினர் முடிவு செய்துள்ள நிலையில் இந்த தகவலை கேட்டு கமல் ரசிகர்கள் மிகவும் மகிழ்ச்சி அடைந்துள்ளனர்.
கடந்த 2001 ஆம் ஆண்டு கமல்ஹாசன் இரு வேடங்களில் நடித்த திரைப்படம் ’ஆளவந்தான்’. சுரேஷ் கிருஷ்ணா இயக்கத்தில் கலைப்புலி எஸ் தாணு தயாரிப்பில் உருவான இந்த படம் வசூல் ரீதியாக வெற்றி பெறவில்லை என்றாலும் கிராபிக்ஸ் காட்சிகளுக்காக தேசிய விருது பெற்றது என்பது குறிப்பிடத்தக்கது. 20 வருடங்களுக்கு முன்பே கமல்ஹாசன் கிராபிக்ஸ் காட்சியில் அசத்தியிருந்தது பெரும் ஆச்சரியத்தை அளித்தது.
இந்த நிலையில் இந்தப் படத்தில் சில மாற்றங்கள் செய்து மீண்டும் வெளியிட தயாரிப்பாளர் கலைப்புலி எஸ் தாணு முடிவு செய்திருப்பதாக ஏற்கனவே செய்தி வெளியானது. தற்போது இந்த படம் 3டி மற்றும் டால்பி தொழில்நுட்பத்தில் மாற்றப்பட்டு விரைவில் ரிலீசாக இருப்பதாகவும் ரிலீஸ் தேதி இன்னும் ஒரு சில நாட்களில் அறிவிக்கப்படும் என்றும் கூறப்படுகிறது.
கமல்ஹாசனின் ’விக்ரம்’ திரைப்படம் சமீபத்தில் வெளியாகி மிகப்பெரிய வெற்றி பெற்றுள்ள நிலையில் ’ஆளவந்தான்’ திரைப்படத்தின் மாறுபட்ட வடிவம் வெளிவந்தால் கண்டிப்பாக அந்த படம் பெரிய வெற்றி பெறும் என்று எதிர்பார்க்கப்படுகிறது. இந்த தகவல் கமல் ரசிகர்களுக்கு குஷியை அளித்துள்ளது என்பது குறிப்பிடத்தக்கது.