உலக நாயகன் நடிகரும் மக்கள் நீதி மய்யம் கட்சியின் தலைவருமான கமல்ஹாசன், ஞாயிறு முதல் வியாழன் வரை தேர்தல் பிரச்சாரமும், வெள்ளி ஒருநாள் மட்டும் ஓய்வு எடுத்துவிட்டு பின்னர் சனிக்கிழமை பிக்பாஸ் நிகழ்ச்சியிலும் கலந்து கொள்கிறார். இந்த நிலையில் இந்த வாரம் திருச்சி மாவட்டத்தில் சுற்றுப்பயணம் செய்து தேர்தல் பிரச்சாரம் செய்த கமல்ஹாசன் சற்றுமுன் சென்னை திரும்பினார். சென்னையில் செய்தியாளர்களை சந்தித்த கமல் கூறியதாவது:

எங்களுக்கு மிகவும் நம்பிக்கை அளிக்கும் ஒரு பிரச்சாரம் ஆகவும், மக்கள் வெள்ளத்தில் மழையிலும் வெயிலிலும் நின்று கொண்டு அவர்கள் எங்களை வரவேற்றது எங்களுக்கு நம்பிக்கையை அளிக்கும் வகையில் வாழ்த்து சொன்னதும் மிகவும் சந்தோஷம் என்று கூறினார்.

மேலும் நடிகர் ரஜினிகாந்தை இன்று நீங்கள் சந்திக்க இருக்கின்றீர்களா? என செய்தியாளர்கள் கேட்டபோது ரஜினியிடம் கேட்டிருக்கின்றேன், அவரிடமிருந்து பதில் வந்ததும் சந்திப்பேன் என்றும், அவருடனான சந்திப்பு நட்புக்காக தான் என்பதும் அரசியல் சந்திப்பு கிடையாது என்றும் அவர் தெரிவித்தார்.

மேலும் ’உதயநிதி அவர்கள் ரஜினிகாந்த் அரசியலை விட்டு விலகியது போல் கமல்ஹாசனும் விலகவேண்டும் என்று கூறியுள்ளாரே’ என்று கேட்டதற்கு பதிலளித்த கமலஹாசன் ’அது அவருடைய பிரார்த்தனை, அதன்படி நடக்க முடியும் என்பதை நான் சொல்ல முடியாது’ என்று கூறினார்.