உலகநாயகன் கமல்ஹாசன் சமீபத்தில் அரசியல் கட்சி தொடங்கியுள்ள நிலையில் மதுரையில் கட்சி ஆரம்ப பொதுக்கூட்டம், பின்னர் சென்னையில் மகளிர் தின பொதுக்கூட்டம் ஆகிய இரண்டு கூட்டங்களை முடித்துவிட்டார். மேலும் வரும் ஏப்ரல் 4ஆம் தேதி திருச்சியிலும் ஒரு பிரமாண்ட கூட்டத்தை நடத்த அவர் திட்டமிட்டுள்ளார். இந்த நிலையில் கமல்ஹாசனின் முதல் அரசியல் போராட்டம் குறித்த அறிவிப்பு வெளிவந்துள்ளது

இன்று சென்னை ஆழ்வார்ப்பேட்டை அலுவலகத்தில் செய்தியாளர்களுக்கு பேட்டியளித்த கமல்ஹாசன், வரும் ஏப்ரல் 1ஆம் தேதி தூத்துக்குடி மக்களுடன் இணைந்து ஸ்டெர்லைட் ஆலைக்கு எதிராக போராடவுள்ளதாக அறிவித்துள்ளார். இதுவே அவர் அரசியலில் குதித்த பின்னர் அறிவிக்கும் முதல் போராட்டம் என்பது குறிப்பிடத்தக்கது.

மேலும் காவிரி மேலாண்மை விஷயத்திற்காக தற்கொலை செய்து கொள்வதாக கூறுவது பித்தலாட்டத்தனம் என்றும், தற்கொலை எல்லாம் அவசியமில்லை பதவியை ராஜினாமா செய்து அழுத்தம் கொடுத்தாலே போதுமானது என்று கமல் கூறினார்.

காவிரி மேலாண்மை வாரியம் குறித்து ரஜினியின் டுவீட் வரவேற்கத்தக்கது என்றும், அதனை தான் ஆதரிப்பதாகவும் கமல் தெரிவித்துள்ளார்.