லைகா தயாரிப்பில் ஷங்கர் இயக்கத்தில் கமல்ஹாசன் நடிப்பில் உருவாகவிருந்த 'இந்தியன் 2' படத்தின் படப்பிடிப்பு முதல்கட்ட படப்ப்பிடிப்புடன் நின்றுவிட்டது. இந்த படத்தை லைகா நிறுவனம் கைவிட்டதாகவும், அதற்கு பதிலாக ரிலையன்ஸ் அல்லது சன்பிக்சர்ஸ் தயாரிக்கலாம் என்றும் கூறப்பட்டது. ஆனால் இதுகுறித்த அதிகாரபூர்வ தகவல் இன்னும் வெளியாகவில்லை

இந்த நிலையில் மக்களவை தேர்தலில் கடந்த சில மாதங்களாக பிசியாக இருந்த கமல்ஹாசன் இனி அடுத்த சட்டமன்ற தேர்தல் வரை சினிமாவில் பிசியாக இருக்க முடிவு செய்துவிட்டாராம். முதல்கட்டமாக பிக்பாஸ் 3' நிகழ்ச்சியை தொகுத்து வழங்கும் கமல்ஹாசன், அதன்பின்னர் 'இந்தியன் 2' படத்திற்கு பதிலாக 'தேவர் மகன் 2' படத்தை தொடங்க முடிவு செய்துள்ளதாக கூறப்படுகிறது.

கடந்த ஆண்டு அக்டோபர் மாதம் 'தேவர் மகன் 2' படம் குறித்த அறிவிப்பை வெளியிட்ட கமல்ஹாசன், தற்போது இந்த படத்திற்கான ஆரம்பகட்ட பணியை பொள்ளாச்சியில் தொடங்கிவிட்டதாகவும், இதுகுறித்த அறிவிப்பு விரைவில் வெளிவரும் என்றும் கூறப்படுகிறது

மேலும் இந்த படத்தை கமல்ஹாசனே தயாரித்து இயக்கவுள்ளதாகவும், இந்த படத்தில் முன்னணி இளம்நடிகர் ஒருவர் முக்கிய வேடத்தில் நடிக்கவுள்ளதாகவும் கூறப்படுகிறது