கார்த்திக் மகனுக்காக கமல் பாடிய பாடல்
- IndiaGlitz, [Thursday,December 01 2016]
உலகநாயகன் கமல்ஹாசன் தனது படங்களில் மட்டுமின்றி நட்புக்காக அவர் நடிக்காத சில படங்களிலும் பாடல்களை பாடி வருவது தெரிந்ததே. இந்நிலையில் கமல்ஹாசனின் நண்பர்களில் ஒருவராகிய கார்த்திக் அவர்களின் மகன் கவுதம் கார்த்திக் நடிக்கும் 'முத்துராமலிங்கம்' என்ற படத்திற்காக ஒரு பாடலை பாடியுள்ளார்.
இசைஞானி இளையராஜா இசையில் 'தெற்கத்திய சிங்கமடா முத்துராமலிங்கமடா' என்று தொடங்கும் பாடலைத்தான் கமல் பாடியுள்ளார். இந்த பாடல் உள்பட இந்த படத்தின் பாடல்கள் அனைத்தும் மறைந்த கவிஞர் பஞ்சு அருணாசலம் மரணத்திற்கு முன்பே எழுதியது என்பது குறிப்பிடத்தக்கது.
கவுதம் கார்த்திக், பிரியா ஆனந்த் முக்கிய வேடத்தில் நடித்து வரும் இந்த படத்தில் நெப்போலியன், 'மூக்கையாதேவர்' என்ற பாத்திரத்தில் நடித்துள்ளார். மேலும் சுமன், விவேக், ராதாரவி, வம்சி கிருஷ்ணா, சின்னி ஜெயந்த், சிங்கம்புலி, சுகன்யா, ரேகா உள்பட பலர் நடித்துள்ள இந்த படத்தை ராஜதுரை இயக்கி வருகிறார்.