முதல்வரை சந்திக்கின்றார் கமல்ஹாசன்
- IndiaGlitz, [Thursday,August 31 2017]
உலக நாயகன் கமல்ஹாசன் கடந்த சில மாதங்களாகவே அதிரடி அரசியல் கருத்துக்களை தனது டுவிட்டர் பக்கத்தில் பதிவு செய்து வருகிறார். அமைச்சர்களின் ஊழல் முதல் முதலமைச்சர் வரை விமர்சனம் செய்த கமல்ஹாசன் நேற்று கோவையில் கோட்டையை நோக்கி பயணிப்போம் என்று ஆவேசமாக பேசினார். அவருடைய பேச்சில் இருந்து வெகுவிரைவில் அவர் நேரடி அரசியலில் ஈடுபடுவார் என்று எதிர்பார்க்கப்படுகிறது.
இந்த நிலையில் திடீரென முதலமைச்சரை கமல்ஹாசன் சந்திக்கவுள்ளதாக செய்திகள் வெளிவந்துள்ளது. ஆனால் அவர் சந்திக்கவிருப்பது தமிழக முதலமைச்சரை அல்ல, கேரள முதலமைச்சர் பினராயி விஜயன் அவர்களை என்பது குறிப்பிடத்தக்கது.
கமல்ஹாசன் செவாலியே விருது பெற்ற போது அப்போதைய தமிழக முதலமைச்சர் ஜெயலலிதா வாழ்த்துகூட கூறாத நிலையில் கேரள முதலமைச்சர் கமல்ஹாசனுக்கு வாழ்த்து கூறியதும், அதற்கு கமல்ஹாசன் அவருக்கு நன்றி தெரிவித்ததோடு 'நான் ஒரு மலையாளி; பினராயி விஜயன் என்னுடைய மாநிலத்தைச் சேர்ந்த முதல்வர் என்று குறிப்பிட்டிருந்ததும் குறிப்பிடத்தக்கது.
கேரள முதல்வரை சந்தித்த பின்னர் கமல்ஹாசனின் அடுத்தகட்ட நடவடிக்கை என்னவாக இருக்கும் என்பதை அறிய அவரது ரசிகர்கள் மட்டுமின்றி தமிழக மக்களே வெகு ஆர்வமாக உள்ளனர்.