உலகநாயகன் கமல்ஹாசன் பிறந்தநாள் இன்று கொண்டாடப்படும் நிலையில், பிறந்தநாள் ஸ்பெஷல் ஆக அவர் நடித்து வரும் ‘தக்லைஃப்’ படத்தின் டீசர் வீடியோ வெளியாகி இணையத்தில் வைரலாகி வருகிறது. மேலும், இந்த படத்தின் ரிலீஸ் தேதியும் அதிகாரபூர்வமாக அறிவிக்கப்பட்டுள்ளது.

உலகநாயகன் கமல்ஹாசன் நடிப்பில், மணிரத்னம் இயக்கத்தில், ஏ.ஆர். ரகுமான் இசையில் உருவாகி வரும் திரைப்படம் ‘தக்லைஃப்’. இந்த படத்தின் படப்பிடிப்பு கடந்த சில மாதங்களாக நடைபெற்று வந்த நிலையில், சமீபத்தில் படப்பிடிப்பு முடிவடைந்து, தற்போது தொழில்நுட்ப பணிகள் நடந்து வருவதாக தகவல் கிடைத்துள்ளது.

இந்த நிலையில், இன்று கமல்ஹாசனின் பிறந்தநாளை முன்னிட்டு டீசர் வீடியோ வெளியாகும் என்று ஏற்கனவே அறிவிக்கப்பட்ட நிலையில், இந்த டீசர் வீடியோவில் கமல்ஹாசன் மற்றும் சிம்புவின் மாஸ் ஆக்ஷன் காட்சிகள் இடம் பெற்றுள்ளன. மேலும், கமல்ஹாசனின் சிறுவயது தோற்றமும் இந்த டீசரில் இருப்பதை பார்த்து ரசிகர்கள் மகிழ்ச்சியில் மூழ்கியுள்ளனர்.

அது மட்டுமின்றி, ‘தக்லைஃப்’ திரைப்படம் அடுத்த ஆண்டு ஜூன் 5-ம் தேதி வெளியாகும் என்று அதிகாரபூர்வமாக அறிவிக்கப்பட்டுள்ளது.

கமல்ஹாசன், சிலம்பரசன், த்ரிஷா, அபிராமி, நாசர், அலி ஃபைசல், பங்கஜ் திரிபாதி, அசோக் செல்வன், ஜோஜு ஜார்ஜ், ஐஸ்வர்யா லட்சுமி, வையாபுரி உள்ளிட்ட பலர் நடிக்கும் இந்த படத்திற்கு இசைப்புயல் ஏ.ஆர்.ரகுமான் இசையமைத்து வருகிறார். ரவி கே சந்திரன் ஒளிப்பதிவில் ஸ்ரீகர் பிரசாத் படத்தொகுப்பில் உருவாகி வரும் இந்த படத்தை கமல்ஹாசனின் ராஜ்கமல் இன்டர்நேஷனல் நிறுவனம், மெட்ராஸ் டாக்கீஸ் நிறுவனம் மற்றும் ரெட் ஜெயண்ட் மூவிஸ் நிறுவனம் இணைந்து தயாரிக்கின்றன.