கேரளாவின் பல பகுதிகளில் தற்போது வெள்ளத்தால் மூழ்கி அம்மாநில மக்கள் பெரும் சிரமத்தில் உள்ளனர். வெள்ளம் மற்றும் நிலச்சரிவால் சுமார் 20 பேர் பலியாகியது மட்டுமின்றி கணக்கிடமுடியாத அளவுக்கு பொருட்சேதமும் ஏற்பட்டுள்ளது.

இந்த நிலையில் கேரளாவில் வெள்ள நிவாரண பணிகள் முழுவீச்சில் நடந்து வருகிறது. மத்திய அரசும், அண்டை மாநிலங்களும் கேரளாவுக்கு பொருள் உதவி மட்டுமின்றி மீட்புப்பணியிலும் உதவி செய்து வருகின்றது.

இந்த நிலையில் உலக நாயகன் கமல்ஹாசன், கேரள முதல்வரின் நிவாரண நிதியாக ரூ.25 லட்சம் வழங்கியுள்ளார். அதேபோல் கமல்ஹாசன் தொகுத்து வழங்கும் பிக்பாஸ் நிகழ்ச்சியை ஒளிபரப்பும் தனியார் தொலைக்காட்சியும் ரூ.25 லட்சம் வழங்கியுள்ளது என்பது குறிப்பிடத்தக்கது. மேலும் அனைவரும் இப்பேரிடர் காலத்தில் நமது சகோதரர்களுக்கு உதவிட வேண்டும் என்று கமல் வேண்டுகோள் விடுத்துள்ளார்.

கேரள மாநிலத்தை தனது சொந்த மாநிலம் போல் நினைத்து செயல்படும் கமல்ஹாசன், அம்மாநில மக்களுக்கு செய்த இந்த உதவி பேருதவியாக பார்க்கப்படுகிறது.