தமிழகத்தில் நடைபெற்ற சட்டமன்ற தேர்தலில் வாக்குகள் இன்று காலை முதல் எண்ணப்பட்டு வரும் நிலையில் இந்த தேர்தலில் திரையுலக பிரபலங்களும் ஒருசிலர் போட்டியிட்டனர் என்பது தெரிந்ததே. 

சேப்பாக்கம் தொகுதியில் போட்டியிட்ட திமுக இளைஞர் அணி செயலாளரும் நடிகருமான உதயநிதி ஸ்டாலின் முன்னிலை வகித்து வருகிறார். கோவை தெற்கு தொகுதியில் போட்டியிட்ட கமல்ஹாசன் முன்னிலையில் இருக்கிறார். அவரை எதிர்த்து போட்டியிட்ட வானதி ஸ்ரீனிவாசன் பின்னடைவில் இருக்கிறார். 

ஆயிரம் விளக்கு தொகுதியில் போட்டியிட்ட நடிகையும் பாஜக வேட்பாளருமான குஷ்பு பின்னடைவில் இருக்கிறார். மயிலாப்பூர் தொகுதியில் போட்டியிட்ட கமல்ஹாசனின் மக்கள் நீதி மய்யம் கட்சியின் வேட்பாளரும் நடிகையுமான ஸ்ரீபிரியா பின்னடைவில் இருக்கிறார். விருகம்பாக்கம் தொகுதியில் போட்டியிட்ட சினேகன் பின்னடைவில் இருக்கிறார். இதே தொகுதியில் போட்டியிட்ட நடிகர் மயில்சாமியும் பின்னடைவில் உள்ளார். 

தற்போது உள்ள நிலவரப்படி திரையுலகைச் சேர்ந்தவர்களில் உதயநிதி மற்றும் கமலஹாசன் மட்டுமே முன்னிலையில் உள்ளனர் என்பது குறிப்பிடத்தக்கது.