టాలీవుడ్‌ హీరోగా, నిర్మాతగా వరుస సినిమాలు బిజిబిజీగా ఉన్న నందమూరి హీరో కల్యాణ్ రామ్ నటించిన తాజా చిత్రం ‘ఎంత మంచివాడవురా’. ఈ సినిమా రేపు అనగా జనవరి-15న ప్రేక్షకుల ముందుకు రాబోతోంది. వాస్తవానికి ఈయన సినిమాలోనే కాదు.. రియల్‌గాను ‘చాలా మంచోడు’ అని నందమూరి వీరాభిమానులు, టాలీవుడ్‌లోని కొందరు ప్రముఖులు చెబుతుంటారు. ఈ సినిమా ప్రమోషన్‌లో భాగంగా ఓ ఇంటర్వ్యూలో కల్యాణ్ రామ్ ఆసక్తిక విషయాలు చెప్పుకొచ్చారు. మరీ ముఖ్యంగా నాన్న హరికృష్ణ, బాబాయ్ బాలకృష్ణ గురించి ఈ సందర్భంగా ప్రస్తావనకు వచ్చింది.

పేరుకు మచ్చ తీసుకురాను!

‘‘నందమూరి’ అనే ఇంటిపేరును మా తాతగారు మాకు ఇచ్చారు. ఆ పేరుకు మచ్చ తీసుకురాకూడదనే విషయాన్ని గుర్తుపెట్టుకుని నా పనులు చేసుకుంటూ వెళుతుంటాను.. అందుకు అనుగుణంగానే నా నిర్ణయాలు తీసుకుంటాను. నాన్నగారి విషయానికొస్తే ఆయన ముక్కుసూటి మనిషి.. విషయమేదైనా ఉంటే ముఖం మీదే చెప్పేస్తారు. వెనక మాట్లాడటం అనేది ఆయనకి అలవాటే లేదు. ఎదుటి వ్యక్తి తీరు నచ్చకపోతే ఆయన అక్కడి నుంచి వెళ్లిపోతారేగానీ.. పక్కకి వెళ్లి మాట్లాడటం అనేది ఆయనకి తెలియదు. ఆయన నుంచి నేను కూడా అదే నేర్చుకున్నాను’ అని నందమూరి హీరో చెప్పాడు.