என்ன திருப்பி குடுக்கறதுனு தெரியல: காளிவெங்கட்டின் ஆனந்தக்கண்ணீர்
- IndiaGlitz, [Friday,October 20 2017]
தளபதி விஜய்யின் 'மெர்சல்' திரைப்படத்தில் விஜய்யை அடுத்து அனைவரையும் கவர்ந்த ஒரு கேரக்டர் ஆட்டோ டிரைவராக நடித்த காளி வெங்கட் கேரக்டர்தான். பதினைந்து நிமிடங்களே படத்தில் வந்தாலும் உருக வைக்கும் காட்சிகள் அனைவரின் கண்களிலும் கண்ணீரை வரவழைத்தது.
மகளிடம் பாசத்தை காண்பிக்கும் காட்சியிலும், விபத்துக்குள்ளாகி துடிக்கும் மகளை கண்டு கதறுவதும் டாக்டரிடம் பரிதாபமாக ஏமாறுவதும் என காளி வெங்கட் கொடுத்த வாய்ப்பை மிக நன்றாக பயன்படுத்தியுள்ளார். காளிவெங்கட்டின் நடிப்புக்கு சமூக வலைத்தளங்களில் பாராட்டுக்கள் குவிந்து வருகிறது. இந்த படத்தை நெகட்டிவ் விமர்சனம் செய்த ஒருசில ஊடகங்கள் கூட காளிவெங்கட் காட்சிகளுக்கு பாராட்டுக்களை தெரிவித்துள்ளன.
இந்த நிலையில் ரசிகர்கள் காட்டும் அன்புக்கு என்னால் என்ன திருப்பி கொடுப்பது என்றே தெரியவில்லை என்று மனமுருகி காளிவெங்கட் தனது டுவிட்டரில் ஆனந்தக்கண்ணீருடன் தனது நன்றியை பதிவு செய்துள்ளார். அவர் தனது டுவிட்டர் பக்கத்தில், ' உங்க அன்புக்கும் பாராட்டுக்கும் என்ன திருப்பி குடுக்கறதுனு தெரியல, அனைவருக்கும் நன்றி' என்று தெரிவித்துள்ளார். ஒரு நல்ல கலைஞனுக்கு இதைவிட வேறு பெருமை வேண்டுமா?