இயக்குனர் சற்குணம் இயக்கத்தில் உருவான களவாணி படத்தில் அறிமுகமான நடிகை ஓவியா, அதன்பின்னர் பல தமிழ் திரைப்படங்களில் நடித்தபோதிலும், பிக்பாஸ் நிகழ்ச்சியால் உலக தமிழர்களிடையே பெரும்புகழ் பெற்றார்.

இந்த நிலையில் ஓவியா தற்போது ராகவா லாரன்ஸ் நடித்து இயக்கி வரும் 'காஞ்சனா 3' படத்தில் நடித்து வருகிறார். இந்த படத்தின் படப்பிடிப்பு விறுவிறுப்புடன் நடைபெற்று வரும் நிலையில் ஓவியாவின் அடுத்த பட டைட்டில் தற்போது அறிவிக்கப்பட்டுள்ளது.

ஓவியாவின் அடுத்த படத்தின் டைட்டில் 'K2' அதாவது 'களவாணி 2. இந்த படத்தையும் சற்குணம் இயக்கவுள்ளார். விமல், ஓவியா மீண்டும் இணையும் இந்த படத்தின் டைட்டில் போஸ்டரை முன்னணி நடிகர்களில் ஒருவரான சிவகார்த்திகேயன் வெளியிட்டுள்ளார். கோலிவுட் திரையுலகில் முன்னணி நடிகர்கள் அனைவரும் இரண்டாம் பாக படங்களில் நடித்து கொண்டிருக்கும் நிலையில் தற்போது ஓவியாவும் அந்த பட்டியலில் இணைந்துள்ளார்