லேடி சூப்பர் ஸ்டார் நயன்தாரா தனக்குரிய கேரக்டர் பிடித்துவிட்டது என்றால் அந்த படத்தின் ஹீரோ, இயக்குனர் புதுமுகமாக இருந்தாலும் நடிக்க ஒப்புக்கொள்வார் என்பது தெரிந்ததே. அந்த வகையில் அவர் நடித்து வரும் படங்களில் ஒன்று 'கோலமாவு கோகிலா'. அறிமுக இயக்குனர் நெல்சன் இயக்கத்தில் யோகிபாபு ஒருதலையாக காதலிக்கும் ஒரு கேரக்டரில் நடித்து வருகிறார்

இந்த நிலையில் நயன்தாராவின் அடுத்த படத்தை 'மா' மற்றும் 'லட்சுமி' போன்ற குறும்படங்களை இயக்கிய இயக்கிய சர்ஜூன் இயக்கவுள்ளார். இந்த படத்தின் முக்கிய கேரக்டர் ஒன்றில் கலையரசன் நடிப்பது உறுதியானவுடன், அவர் நயன்தாராவுக்கு ஜோடியாக நடிக்கின்றாரா? என்ற கேள்வி எழுந்தது.

இந்த நிலையில் இதுகுறித்து இயக்குனர் சர்ஜூன் விளக்கம் அளித்துள்ளார். நயன்தாரா முக்கிய கேரக்டரில் நடிக்கும் இந்த படத்தில் நான்கு அல்லது ஐந்து சப்போர்ட்டிங் கேரக்டர் இருப்பதாகவும் அவற்றில் ஒன்றில்தான் கலையரசன் நடிப்பதாகவும், நயன்தாராவுக்கு அவர் ஜோடியாக நடிக்கவில்லை என்றும் கூறினார். மேலும் கலையரசனுக்கு இதுவரையில் இல்லாத வகையில் இந்த படத்தின் கேரக்டரும் தோற்றமும் வித்தியாசமாக இருக்கும் என்றும் அவர் தெரிவித்துள்ளார்.

மேலும் இந்த படத்தின் இன்னொரு சப்போர்ட்டிங் கேரக்டரில் யோகிபாபு நடிக்கவுள்ளார். இந்த படத்தில் யோகிபாபுவை நடிக்க வைக்க நயன்தாரா இயக்குனரிடம் பரிந்துரை செய்ததாகவும் கூறப்படுகிறது

இந்த படத்தின் படப்பிடிப்பு வரும் செப்டம்பர் முதல் தொடங்கவுள்ளது என்பது குறிப்பிடத்தக்கது