'கபாலி'க்காக கோர்ட் படியேறிய கலைப்புலி எஸ்.தாணு
- IndiaGlitz, [Thursday,July 14 2016]
கலைப்புலி எஸ்.தாணு தயாரிப்பில் சூப்பர் ஸ்டார் ரஜினிகாந்த் நடித்த 'கபாலி' படத்தின் ரிலீஸ் தேதி நெருங்க நெருங்க ரசிகர்களுக்கு மட்டுமின்றி படக்குழுவினர்களுக்கு டென்ஷன் அதிகரித்து கொண்டே உள்ளது. இந்த படத்தை திருட்டு டிவிடி கும்பலில் இருந்து காப்பாற்றி படத்தை தியேட்டருக்கு கொண்டு போய் சேர்க்க வேண்டும் என்பதே தயாரிப்பாளரின் முக்கிய கவலையாக உள்ளது.
இந்நிலையில் ஒருசில இணையதளங்கள் 'கபாலி' படத்தை ரிலீஸ் தினத்தின் அன்றே தங்கள் இணையதளங்களில் பதிவு செய்ய முயற்சி செய்து வருவதாக தகவல்கள் வெளிவந்துள்ளது. இத்தகைய முயற்சிகளை தடுக்கவும், அதேபோல் திருட்டு டிவிடி கும்பலிடம் இருந்து இந்த படத்தை காப்பாற்ற வேண்டும் என்பதற்காகவும் கலைப்புலி எஸ்.தாணு இன்று சென்னை ஐகோர்ட்டில் மனு ஒன்றை தாக்கல் செய்துள்ளதாக கூறப்படுகிறது.
தாணு தனது மனுவில் 'கபாலி' படத்தை சட்டவிரோதமாக இணையதளங்களில் பதிவு செய்யும் நபர்களை கண்டறிந்து நடவடிக்கை எடுக்க வேண்டும் என்று அவர் கேட்டுக்கொண்டுள்ளதாக தெரிகிறது.