ఔను కాజల్ ప్రెగ్నెంట్.. కన్ఫర్మ్ చేసిన గౌతమ్ కిచ్లు, ఒకే ఒక్క పోస్ట్‌తో ప్రచారానికి చెక్
- IndiaGlitz, [Sunday,January 02 2022]
గత కొన్ని నెలలుగా జరుగుతున్న ప్రచారానికి సినీ నటి కాజల్ దంపతులు తెరదించారు. న్యూఇయర్ కానుకగా ఆమె తన అభిమానులకు శుభవార్త చెప్పారు. కాజల్ గర్భవతి అంటూ ఆమె భర్త గౌతమ్ కిచ్లు ఆదివారం సోషల్ మీడియా ద్వారా వెల్లడించారు. కొత్త సంవత్సరంలోకి అడుగుపెట్టిన సందర్భంగా గౌతమ్.. '2022.. నిన్నే చూస్తున్నా..' అంటూ ప్రెగ్నెంట్ లేడీ ఎమోజీని ఎటాచ్‌ చేశారు. దీంతో సినీ ప్రముఖులు, అభిమానులు కాజల్-గౌతమ్ లకు సోషల్ మీడియా వేదికగా శుభాకాంక్షలు చెబుతున్నారు.
తెలుగుతో పాటు దక్షిణాదిలోని అగ్రహీరోలందరితో నటించిన కాజల్.. తన చిన్ననాటి స్నేహితుడు, ప్రముఖ వ్యాపారవేత్త గౌతమ్ కిచ్లుని గతేడాది వివాహం చేసుకున్న సంగతి తెలిసిందే. పెళ్లి తరువాత సినిమాలకు స్వస్తి చెప్పకుండా.. ఫ్యామిలీ లైఫ్ ఎంజాయ్ చేస్తూనే కొన్ని ప్రాజెక్ట్స్‌లో నటించారు కాజల్. టాలీవుడ్ అగ్రకథానాయకుడు చిరంజీవితో ఆమె నటించిన 'ఆచార్య' సినిమా విడుదలకు సిద్ధంగా ఉంది. ‘‘ఉమ’’ అనే బాలీవుడ్ సినిమాలోనూ నటించింది. ఈ మూవీ విడుదలకు స‌న్న‌ద్ధ‌మ‌వుతుంది. ఇందులో తానొక మిస్టీరియ‌స్ అమ్మాయి పాత్ర‌లో క‌నిపిస్తానని అభిమానులకు కాజల్ తెలియజేశారు.
అయితే తమిళ దర్శక దిగ్గజం శంకర్- విలక్షణ నటుడు కమల్ హాసన్ కాంబినేషన్‌లో తెరకెక్కిన ‘‘ఇండియ‌న్ 2’’లోనూ కాజల్ ఛాన్స్ దక్కించుకుంది. అయితే అనుకోని కారణాల వల్ల ఇప్పుడా ప్రాజెక్ట్ ఆగింది. అలాగే నాగార్జున- ప్రవీణ్ సత్తారు కలయికలో రూపొందుతున్న ‘‘ది ఘోస్ట్’’లోనూ కాజలే హీరోయిన్. అయితే ఆమె ఈ ప్రాజెక్ట్ నుంచి తప్పుకుందని ఫిలింనగర్ టాక్. గర్భవతి అయిన కారణంగానే కాజల్ కొన్ని సినిమాల నుంచి తప్పుకుందంటూ ప్రచారం జరిగింది. దీనిపై కాజల్ నుంచి ఎలాంటి ప్రకటనా రాలేదు.. దీంతో నాటి నుంచి సోషల్ మీడియాలో రకరకాల కథనాలు వస్తున్నాయి. తాజాగా గౌతమ్ కిచ్లు ప్రకటనతో వాటికి తెరపడినట్లే.