இயக்குனர் ஏ ஆர் முருகதாஸ் இயக்கத்தில், சல்மான் கான் நடிப்பில் உருவாகும் ’சிக்கந்தர்’ என்ற படத்தின் அறிவிப்பு கடந்த சில மாதங்களுக்கு முன் வெளியான நிலையில் தற்போது இந்த படத்தின் படப்பிடிப்பு விறுவிறுப்பாக நடைபெற்று வருவதாக செய்திகள் வெளியானது. சமீபத்தில் கூட மும்பையில் தாராவி போன்ற செட் அமைக்கப்பட்டு அதில் முக்கிய காட்சிகள் படமாக்கப்பட்டதாக கூறப்பட்டது.

இந்த நிலையில் இந்த படத்தில் சல்மான் கான் ஜோடியாக ராஷ்மிகா மந்தனா நடிக்க இருப்பதாக அறிவிக்கப்பட்டிருந்த நிலையில் அவரும் சமீபகாலமாக படப்பிடிப்பில் கலந்து கொண்டிருந்தார். இந்த நிலையில் தற்போது இந்த படத்தில் மேலும் ஒரு நாயகி இணைய இருப்பதாக செய்திகள் வெளியாகி உள்ளன.

’சிக்கந்தர்’ திரைப்படத்தில் இணையும் இன்னொரு நாயகி காஜல் அகர்வால் என சமூக வலைதளங்களில் செய்திகள் வெளியாகி கொண்டிருக்கும் நிலையில் இது குறித்து அதிகாரப்பூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது. ஏற்கனவே ஏஆர் முருகதாஸ் இயக்கத்தில் உருவான தளபதி விஜய்யின் ’துப்பாக்கி’ திரைப்படத்தில் நாயகியாக காஜல் அகர்வால் நடித்திருந்த நிலையில் தற்போது மீண்டும் ஏஆர் முருகதாஸ் இயக்கத்தில் உருவாகும் படத்தில் காக; அகர்வால் இணைகிறார் என்பது குறிப்பிடத்தக்கது.

தமிழில் அஜித், விஜய், உட்பட பல பிரபல நடிகர்களுடனும் தெலுங்கில் முன்னணி நடிகர்களுடன் நடித்த காஜல் அகர்வால் தற்போது சல்மான் கான் படத்தில் நடிக்க இருப்பதை அடுத்து அவருக்கு ரசிகர்கள் வாழ்த்துக்களை தெரிவித்து வருகின்றனர்.