టాలీవుడ్‌లో 12 ఏళ్ల క్రితం `ల‌క్ష్మీక‌ళ్యాణం` సినిమాతో హీరోయిన్‌గా ఎంట్రీ ఇచ్చింది కాజ‌ల్ అగ‌ర్వాల్‌. అతి త‌క్కువ కాలంలోనే స్టార్ హీరోయిన్‌గా పేరు తెచ్చుకుని అగ్ర క‌థానాయ‌కులైన చిరంజీవి, ఎన్టీఆర్‌, రామ్‌చ‌ర‌ణ్‌, బ‌న్ని, మ‌హేశ్ ఇలా అందరితో ఆడిపాడింది. 50 పైగా సినిమాల‌ను పూర్తి చేసిన అతి కొద్ది మంది నేటి త‌రం హీరోయిన్స్‌లో ఆమె ఒక‌రు. నేటి త‌రం కుర్ర హీరోలైన బెల్లంకొండ సాయిశ్రీనివాస్ వంటి వారితోనూ న‌టిస్తుంది. టాలీవుడ్ గ్లామ‌ర్ చంద‌మామ‌గా పేరు తెచ్చుకున్న ఈ అమ్మ‌డుకి సింగ‌పూర్ మేడ‌మ్ టుస్సాడ్స్‌లో మైన‌పు విగ్ర‌హం పెట్టే అరుదైన ఘ‌న‌త ద‌క్కింది.

ఆమె మైన‌పు విగ్ర‌హానికి త‌గ్గట్టు కొల‌త‌లు గ‌ట్రా తీసుకున్న మ్యూజియం నిర్వాహ‌కులు తాజాగా విగ్రహాన్ని త‌యారు చేశార‌ట‌. ఫిబ్ర‌వ‌రి 5న కాజ‌ల్ మైన‌పు బొమ్మ‌ను ప్ర‌ద‌ర్శించ‌బోతున్నార‌ట‌. ఈ విష‌యాన్ని కాజ‌ల్ అధికారికంగా ప్ర‌క‌టించింది. ప్ర‌భాస్‌, మ‌హేశ్ వంటి టాలీవుడ్ స్టార్స్ మైన‌పు బొమ్మ‌ల‌ను ప్ర‌తిష్టించిన టుస్సాడ్స్ ఇప్పుడు కాజ‌ల్‌.. విగ్ర‌హాన్ని ప్ర‌తిష్టించ‌నుండ‌టం విశేషం. ప్ర‌స్తుతం ఈ సుంద‌రాంగి సీనియ‌ర్ స్టార్ క‌మ‌ల్‌హాస‌న్ `ఇండియ‌న్ 2` చిత్రంలో న‌టిస్తుంది. ఈ సినిమాలో ఈమె 85 బామ పాత్ర‌లో న‌టించ‌నుంది.