பாலாஜி சக்திவேல் இயக்கிய 'காதல்' படத்தில் நடித்த 'விருச்சிககாந்த் என்ற பாபு' சினிமா வாய்ப்பு இலலாத நிலையில் கோவிலில் பிச்சை எடுத்து கொண்டிருந்தார் என்பதையும் அவரை சமீபத்தில் தீனா மற்றும் மோகன் ஆகியோர் மீட்டு அவருக்கு தேவையான அடிப்படை தேவைகளை வழங்கி உதவி செய்தனர் என்பதையும் நாம் ஏற்கனவே பார்த்தோம். மேலும் விருச்சிககாந்துக்கு திரையுலகினர் மீண்டும் வாய்ப்பு அளிக்க வேண்டும் என்று தீனா மற்றும் மோகன் வெளியிட்டிருந்த வீடியோ குறித்தும் நாம் அறிந்ததே.

இந்த நிலையில் இந்த வீடியோவிற்கு தற்போது கைமேல் பலன் கிடைத்துள்ளது. சமுத்திரக்கனி நடிக்கவுள்ள அடுத்த படத்தில் விருச்சிகாந்துக்கு ஒரு வாய்ப்பு வழங்கப்பட்டுள்ளது. அவர் இன்றில் இருந்தே படப்பிடிப்புக்கு செல்லவுள்ளார். அதுமட்டுமின்றி மேலும் 25 இயக்குனர்கள் விருச்சிககாந்துக்கு வாய்ப்பு தருவதாக உறுதி அளித்துள்ளதாகவும் தகவல்கள் வெளிவந்துள்ளது.

விருச்சிககாந்துக்கு தற்போது தங்குவதற்கு இடம் ஏற்பாடு செய்யப்பட்டு அவருக்கு உடைகள் மற்றும் ஆண்ட்ராய்டு போன் வாங்கி கொடுக்கப்பட்டுள்ளதாகவும், அவர் வெகுவிரைவில் கோலிவுட் திரையுலகில் நல்ல நிலைமைக்கு வருவார் என்றும் திரையுலகினர் நம்பிக்கை தெரிவித்துள்ளனர்.