'கபாலி' இசை வெளியீடு. அதிகாரபூர்வ தேதி அறிவிப்பு
- IndiaGlitz, [Friday,June 03 2016]
சூப்பர் ஸ்டார் ரஜினிகாந்த் நடித்த 'கபாலி' திரைப்படத்தின் இசை வெளியீட்டு தேதி குறித்து கடந்த சில நாட்களாக பல்வேறு தகவல்கள் வெளிவந்து கொண்டிருந்தது. இந்த படத்தின் பாடல்கள் வரும் 9ஆம் தேதி அல்லது 11ஆம் தேதி வெளியாகும் என செய்திகள் வெளிவந்து கொண்டிருந்த நிலையில் தற்போது அதிகாரபூர்வமாக ஜூன் 12ஆம் தேதி இசை வெளியீட்டு விழா நடைபெறும் என்று அறிவிக்கப்பட்டுள்ளது.
இந்த தகவலை 'கபாலி' படத்தின் தயாரிப்பாளர் கலைப்புலி எஸ். தாணு தனது சமூக வலைத்தளத்தில் உறுதி செய்துள்ளார். தற்போது அமெரிக்காவில் குடும்பத்துடன் ஓய்வு எடுத்து கொண்டிருக்கும் ரஜினிகாந்த் இன்னும் ஓரிரு நாட்களில் சென்னை திரும்பிவிடுவார் என்றும் அவர் இந்த நிகழ்ச்சியில் கண்டிப்பாக கலந்து கொள்வார் என்றும் படக்குழுவினர் தெரிவித்துள்ளனர்.
முதன்முதலாக ரஜினிகாந்த் படத்திற்கு சந்தோஷ் குமார் இசையமைத்துள்ளதால் இந்த படத்தின் பாடல்களுக்கு மிகப்பெரிய எதிர்பார்ப்பு ஏற்பட்டுள்ளது. எனவேதான் மிகப்பெரிய தொகை கொடுத்து திங்க் மியூசிக் இந்த படத்தின் பாடல்களின் உரிமையை பெற்றுள்ளது என்பது குறிப்பிடத்தக்கது.