త‌మిళ అగ్ర క‌థానాయ‌కుల‌కు తెలుగులోనూ మంచి మార్కెట్ ఉన్న సంగ‌తి తెలిసిందే. అందుకే రెండు చోట్ల ఒకే రోజున త‌మ సినిమాల‌ను విడుద‌ల చేయ‌డానికి త‌గిన జాగ్ర‌త్త‌లు తీసుకుంటారు. ఈ సంప్ర‌దాయం కేవ‌లం సినిమాల‌కే ప‌రిమితం కాకుండా.. ఆడియోల‌కు కూడా వ‌ర్తించేలా జాగ్ర‌త్త‌లు తీసుకోవ‌డం ఇప్పుడిప్పుడే ఆన‌వాయితీగా మారుతోంది.

ఆ మ‌ధ్య సూర్య న‌టించిన '24' ఆడియోని త‌మిళంలో ఉద‌యం పూట వేడుక‌గా జ‌రిపారు. క‌ట్ చేస్తే.. అదే రోజు సాయంత్రం తెలుగులో ఘ‌నంగా ఆడియో ఫంక్ష‌న్ ని నిర్వ‌హించారు. ఇప్పుడు ఇదే శైలిలో త‌మిళ సూప‌ర్ స్టార్ ర‌జ‌నీకాంత్ కొత్త చిత్రం ఆడియో వేడుక‌ని ప్లాన్ చేస్తున్నట్లు క‌థ‌నాలు వినిపిస్తున్నాయి.

'క‌బాలి' పేరుతో తమిళంతో పాటు తెలుగులోనూ విడుద‌ల కానున్న ఈ సినిమా పాట‌ల‌ను ఈ నెల 30న విడుద‌ల చేయ‌నున్నారు. '24' శైలిలోనే ఉద‌యం త‌మిళంలో, సాయంత్రం తెలుగులో ఆడియో వేడుక‌ల‌ను నిర్వ‌హించ‌నున్నారు. మున్ముందు కూడా ఇదే సంప్ర‌దాయం కొన‌సాగే అవ‌కాశం లేక‌పోలేదు.