ஒரே மாதத்தில் கபாலி-தெறி ஆடியோ விழா?
- IndiaGlitz, [Friday,February 12 2016]
கலைப்புலி எஸ்.தாணு தயாரிப்பில் சூப்பர் ஸ்டார் ரஜினிகாந்த் நடித்து வரும் 'கபாலி' திரைப்படத்தின் இசை வெளியீட்டு விழா வரும் மார்ச் மாதம் வெளியாகும் என அவர் கூறியிருந்தார் என்பதை நேற்று பார்த்தோம். இந்நிலையில் அவர் தயாரித்துள்ள இன்னொரு படமான இளையதளபதி விஜய்யின் 'தெறி' திரைப்படத்தின் ஆடியோவும் மார்ச் மாதம் வெளியாக வாய்ப்பு உள்ளதாக கூறப்படுகிறது. எனவே சூப்பர் ஸ்டார் ரஜினிகாந்த் மற்றும் அடுத்த சூப்பர்ஸ்டார் பட்டத்தை நெருங்கியுள்ள விஜய் ஆகிய இருவர் நடித்த படங்களின் இசை வெளியீட்டு விழா ஒரே மாதத்தில் நடைபெற வாய்ப்புள்ளதாக கூறப்படுகிறது.
'தெறி' படத்தின் பாடல்கள் ஒலிப்பதிவு பணியில் இசையமைப்பாளர் ஜி.வி.பிரகாஷ் இரவுபகலாக இருப்பதாகவும், இந்த பணிகள் இறுதிக்கட்டத்தை நெருங்கிவிட்டதாகவும், இன்னும் ஒருசில நாட்களில் 'தெறி' படத்தின் இசைவெளியீட்டு விழா தேதி குறித்த முறையான அறிவிப்பு வெளிவரும் என்றும் கூறப்படுகிறது.
ஏற்கனவே 'தெறி' திரைப்படம் ஜி.வி.பிரகாஷின் 50வது படம் என்பதால் அவர் கூடுதல் முயற்சியுடன் இசையமைத்து வருவதும் இந்த படத்தின் பாடல்கள் 'கில்லி' படப்பாடல்களுக்கு இணையாக இருக்கும் என்று அவர் தனது சமூக வலைத்தளத்தில் பதிவு செய்திருந்தார் என்பது நாம் அறிந்ததே. இந்த படத்திற்காக ஹரிஹரன் பாடிய மெலடி பாடல், விஜய் பாடிய பாடல், விஜய்யின் அறிமுகப்பாடலான 'ஜித்து ஜில்லாடி' பாடல் ஆகியவை பெரும் வர்வேற்பை பெறும் என எதிர்பார்க்கப்படுகிறது.