இயக்குனர் சிகரம் கே. பாலசந்தர் அறிமுகம் செய்த இரண்டு இசையமைப்பாளர்களுமே ஆஸ்கர் விருதுகளை வென்று உள்ளனர் என்பதை அடுத்து ஜீனியஸ்களை கண்டுபிடித்த ஜீனியஸ் என சமூக வலைதளங்களில் நெட்டிசன்கள் மறைந்த இயக்குனர் பாலச்சந்தருக்கு பாராட்டு தெரிவித்து வருகின்றனர்.

மறைந்த இயக்குனர் கே பாலச்சந்தர் அவர்கள் திறமையாளர்களை கண்டுபிடிப்பதில் திறமையானவர் என்பதும் கமல்ஹாசன், ரஜினிகாந்த் உள்பட பல பிரபலங்களை அவர் தான் திரை உலகில் பிரபலம் ஆக்கினார் என்பதும் குறிப்பிடத்தக்கது. அதேபோல் பாலச்சந்தர் தமிழில் அறிமுகம் செய்த இரண்டு இசையமைப்பாளர்களான எம்எம் கீரவாணி மற்றும் ஏஆர் ரகுமான் ஆகிய இருவருமே ஆஸ்கர் விருதுகளை வென்று உள்ளனர்

கே பாலச்சந்தர் கடந்த 1990 ஆம் ஆண்டு இயக்கிய ’அழகன்’ என்ற திரைப்படத்தில் தான் மரகதமணி என்ற பெயரில் எம்எம் கீரவாணி இசையமைப்பாளராக அறிமுகம் ஆனார். அதன் பின்னர் கே பாலசந்தர் இயக்கத்தில் உருவான ’வானமே எல்லை’ ’ஜாதி மல்லி’ ஆகிய படங்களுக்கும் மரகதமணி தான் இசையமைத்தார். தெலுங்கு திரையுலகில் பிஸியாக இருந்ததால் அவர் அதிக தமிழ் படங்களில் அவர் இசையமைக்க வில்லை என்பது குறிப்பிடத்தக்கது. தற்போது அவர் ’சந்திரமுகி 2’ படத்திற்கு இசையமைத்து வருகிறார் என்பது குறிப்பிடத்தக்கது.

அதேபோல் இசைப்புயல் ஏஆர் ரகுமான் பாலச்சந்தர் தயாரிப்பில் மணிரத்னம் இயக்கத்தில் உருவான ’ரோஜா’ என்ற திரைப்படத்தில் தான் இசையமைப்பாளராக அறிமுகமானார். அதன் பிறகு பாலச்சந்தர் இயக்கிய ’டூயட்’, பாலசந்தரின் 100வது படமான ‘பார்த்தாலே பரவசம்’ உட்பட ஒரு சில படங்களுக்கு இசையமைத்தார் என்பது குறிப்பிடத்தக்கது.

அந்த வகையில் பாலச்சந்தரால் அறிமுகம் செய்யப்பட்ட இரண்டு இசையமைப்பாளர்களும் உலகின் மிகப்பெரிய ஆஸ்கர் விருதை வாங்கி உள்ளதை அடுத்து இது குறித்து செய்திகள் இணையதளங்களில் வைரல் ஆகி வருகிறது.