'ஜூராசிக் வேர்ல்ட் 3' படத்தின் டைட்டில், இயக்குனர், ரிலீஸ் தேதி அறிவிப்பு
- IndiaGlitz, [Thursday,February 27 2020]
ஹாலிவுட்டில் கடந்த 1993 ஆம் ஆண்டு தயாரான ’ஜுராசிக் பார்க்’ என்ற திரைப்படம் ஸ்டீபன் ஸ்பீல்பெர்க் இயக்கத்தில் வெளிவந்து அனைவரையும் அதிர வைத்தது. டைனோசர் மிருகங்களை முதன்முதலாக ஸ்கிரீனில் பார்த்த ரசிகர்கள் மிரண்டு விட்டனர் என்று தான் சொல்ல வேண்டும். அந்த அளவுக்கு தத்ரூபமாக காட்சிகள் அமைக்கப்பட்டு இருந்தது. வசூலிலும் இந்தப்படம் மிகப்பெரிய சாதனை செய்தது என்பது குறிப்பிடத்தக்கது.
இந்த நிலையில் ’ஜுராசிக் பார்க்’ படத்தின் இரண்டாம் பாகம் 1997ஆம் ஆண்டும் மூன்றாம் பாகம் 2001 ஆம் ஆண்டு வெளிவந்தது. இதனை அடுத்து ஜூராசிக் பார்க்’ பட வரிசை நிறுத்தப்பட்டு அதற்கு பதிலாக ’ஜுராசிக் வேர்ல்ட்’ படம் கடந்த 2015 ஆம் ஆண்டு வெளி வந்தது. அதனை அடுத்து 2018ஆம் ஆண்டு ’ஜுராசிக் வேர்ல்ட் படத்தின் இரண்டாம் பாகம் வெளிவந்து உலகம் முழுவதும் மாபெரும் வரவேற்பைப் பெற்றது என்பது குறிப்பிடத்தக்கது.
இந்த நிலையில் ’ஜுராசிக் வேர்ல்ட்’ படத்தின் மூன்றாம் பாகம் விரைவில் தயாராக இருப்பதாகவும் இந்த படத்தின் இயக்குனர் கோலின் ட்ரவாரோ’ என்றும் அறிவிக்கப்பட்டுள்ளது. மேலும் இந்த படத்தின் முதல் நாள் படப்பிடிப்பு குறித்த புகைப்படத்தை இயக்குனர் கோலின் தனது சமூக வலைத்தளத்தில் பகிர்ந்துள்ளார்.
மேலும் இந்த படத்திற்கு ’ஜுராசிக் வேர்ல்ட் டொமினியன்’ என்ற டைட்டில் வைக்கப்பட்டிருப்பதாகவும் 2021 ஆம் ஆண்டு ஜூன் 11 ஆம் தேதி இந்த படம் வெளிவரும் என்றும் அதிகாரபூர்வமாக அறிவிக்கப்பட்டுள்ளது. மேலும் ஜுராசிக் வேர்ல்ட் படத்தில் முதல் மற்றும் இரண்டாம் பாகத்தில் நடித்த நடிகர்கள் அனைவரும் மூன்றாம் வகுப்பிலும் நடிப்பார்கள் என்றும் குறிப்பிடப்பட்டுள்ளது.