ప్రపంచంలోనే అతిపెద్ద ఐమ్యాక్స్‌ స్క్రీన్‌పై ‘సింహాద్రి’.. రీ రిలీజ్‌లోనూ సింగమలై సంచలనాలు
- IndiaGlitz, [Monday,April 24 2023]
ఎస్ఎస్ రాజమౌళి దర్శకత్వంలో జూనియర్ ఎన్టీఆర్ హీరోగా తెరకెక్కిన ‘‘సింహాద్రి’’ సినిమా ప్రభంజనం అంతా ఇంతా కాదు. 20 ఏళ్ల క్రితం 2003 జూలై 9న రిలీజైన ఈ సినిమాలో ఎన్టీఆర్ పవర్ ఫుల్ యాక్టింగ్, పాటలు, భూమిక, అంకిత అందాలు, రాజమౌళి టేకింగ్‌కు ప్రేక్షకులు బ్రహ్మారథం పట్టారు. దాదాపు 52 సెంటర్స్‌లో 175 రోజులు ఆడి సంచలనం సృష్టించింది. రూ.8 కోట్లతో తెరకెక్కిన ఈ సినిమా ఆ రోజుల్లోనే రూ.40 కోట్ల వరకు వసూలు చేసి అప్పటి వరకు తెలుగు చిత్ర సీమలో వున్న అన్ని రికార్డులను బద్ధలు కొట్టింది.
ఎన్టీఆర్ బర్త్ డే కానుకగా సింహాద్రి రీ రిలీజ్ :
ఇదిలావుండగా .. ప్రస్తుతం రీ రిలేజ్‌ల ట్రెండ్ మొదలైన నేపథ్యంలో స్టార్ హీరోల గత సినిమాలన్నీ మళ్లీ ప్రేక్షకుల ముందుకు వస్తున్నాయి. ఖుషి , ఒక్కడు, వర్షం, ఆరెంజ్, చెన్నకేశవరెడ్డి వంటి సినిమాలు మరోసారి రిలీజై కలెక్షన్ల వర్షం కురిపిస్తున్నాయి. ఈ క్రమంలోనే మే 20న జూనియర్ ఎన్టీఆర్ పుట్టినరోజును పురస్కరించుకుని సింహాద్రి సినిమాను కూడా రిలీజ్ చేయనున్నారు. అయితే ఈ విషయంలోనూ జూనియర్ ఎన్టీఆర్ మరో రికార్డు సృష్టించాడు.
మెల్‌బోర్న్ ఐమ్యాక్స్‌ తెరపై సింహాద్రి :
ప్రపంచంలోనే అతిపెద్ద ఐమాక్స్ స్క్రీన్‌లో ఈ సినిమాను ప్రదర్శించనున్నారు. ఆస్ట్రేలియాలోని మెల్‌బోర్న్‌లో ఐమ్యాక్స్‌ ప్రపంచంలోనే అతిపెద్దది. ఈ షోకు సంబంధించి ఇప్పటికే బుకింగ్స్ కూడా ఓపెన్ అయ్యాయి. ఈ విషయాన్ని నందమూరి అభిమానులు సోషల్ మీడియాలో షేర్ చేస్తున్నారు. ప్రస్తుత జనరేషన్‌కి తగినట్లుగా సింహాద్రిని డాల్బీ అట్మాస్ ఆడియోతో 4కేలోకి మార్చారు. తెలుగు రాష్ట్రాల్లోనూ త్వరలో ఈ సినిమా బుకింగ్స్ ఓపెన్ కానున్నాయి. మరి రీ రిలీజ్‌లో సింహాద్రి ఇంకెన్ని రికార్డులు సృష్టిస్తోందో చూడాలి.