பிரபல டான்ஸ் மாஸ்டர் ஜானி தன்னுடைய உதவி நடன இயக்குனர் ஒருவருக்கு பாலியல் தொல்லை கொடுத்ததாக கைது செய்யப்பட்டு சிறையில் அடைக்கப்பட்டுள்ள நிலையில் இந்த விவகாரம் குறித்து அவரது மனைவி ஆயிஷா அளித்த பேட்டி பரபரப்பை ஏற்படுத்தி உள்ளது.

தமிழ், தெலுங்கு திரையுலகில் முன்னணி டான்ஸ் மாஸ்டர்களில் ஒருவரான ஜானி, 16 வயது சிறுமிக்கு பாலியல் தொல்லை கொடுத்ததாக சில வருடங்கள் கழித்து புகார் அளித்துள்ள நிலையில் இந்த புகார் மீது தெலுங்கானா காவல்துறை நடவடிக்கை எடுத்துள்ளனர்.

தற்போது ஜானி மாஸ்டர் கைது செய்யப்பட்டு சிறையில் இருக்கும் நிலையில் அவருடைய மனைவி ஆயிஷா, இந்த விவகாரம் குறித்து சமீபத்தில் தொலைக்காட்சி ஒன்றுக்கு பேட்டி அளித்துள்ளார்.

அந்த பேட்டியில் தன்னுடைய கணவரை பற்றி தனக்கு நன்றாக தெரியும் என்றும், 16 வயது சிறுமியை பாலியல் தொல்லை கொடுத்தார் என்பது முழுக்க முழுக்க பொய் என்றும் ஒரு குற்றச்சாட்டை வைக்கும் முன் தகுந்த ஆதாரங்களை முன்வைக்க வேண்டும் என்றும் தெரிவித்தார்.

மேலும் ஜானி மாஸ்டர் பெயருக்கு களங்கம் விளைவிக்க ஒரு பெரிய சதி நடந்துள்ளது என்றும் அவர் கூறியுள்ளார். அது மட்டும் இன்றி இந்த விவகாரம் குறித்து ஏன் அந்த பெண் இத்தனை வருடங்களாக புகார் அளிக்கவில்லை என்றும் இப்போது திடீரென புகார் அளிக்க வேண்டிய அவசியம் என்ன என்று கேள்வி எழுப்பியுள்ளார். அவரது இந்த பேட்டி தற்போது இணையத்தில் வைரலாகி வருகிறது.