చంద్రబాబూ.. గుర్తుంచుకో..: జయసుధ
- IndiaGlitz, [Thursday,March 07 2019]
సీనియర్ నటి, టీడీపీ నేత జయసుధ.. ఆ పార్టీకి గుడ్‌బై చెప్పి వైఎస్ జగన్ సమక్షంలో వైసీపీ కండువా కప్పుకున్న సంగతి తెలిసిందే. ఈ సందర్భంగా ఆమె మీడియాతో మాట్లాడుతూ.. టీడీపీ ప్రభుత్వం, చంద్రబాబుపై ఆసక్తికర వ్యాఖ్యలు చేశారు. కొద్ది రోజుల క్రితం వైఎస్ జగన్-అక్కినేని నాగార్జున భేటీని ఉద్దేశించి సినీ నటులు.. నేరస్థులను కలవడమేంటి..? అసలు ఎందుకు కలుస్తున్నారు..? అని చంద్రబాబు వ్యాఖ్యానించిన సంగతి తెలిసిందే.
సీఎంకు పరోక్షంగా కౌంటర్..!
తాజాగా.. చంద్రబాబు వ్యాఖ్యలను జయసుధకు గుర్తు చేయగా.. అక్కినేని నాగార్జున సినీ నటుడిగా వచ్చి కలవలేదు. సినిమా వాళ్లంటూ తక్కువ చేసి మాట్లాడాల్సిన అవసరం లేదు. వాళ్లు కూడా ఈ దేశంలో ఓటర్లే. జగన్ లాంటి వ్యక్తులను సినీ నటులు కలవడం దురదృష్టకరమని చంద్రబాబు మాట్లాడకూడదు.. అలా మాట్లాడటం సబబు కాదు. చంద్రబాబు కుటుంబ సభ్యులంతా సినీ ఇండస్ట్రీకి చెందినవారే అనే విషయం గుర్తించుకోవాలని పరోక్షంగా బాబుకు స్ట్రాంగ్ కౌంటరిచ్చారు జయసుధ. కాగా నందమూరి ఫ్యామిలీ మొత్తం సినీ ఇండస్ట్రీలో ఉన్న విషయం విధితమే.
అంతటితో ఆగని ఆమె.. వచ్చే ఎన్నికల్లో జగన్ ఖచ్చితంగా సీఎం అవుతారని జోస్యం చెప్పారు. ఆయన గెలుపుపై ధీమాగా ఉన్నానని.. తాను టీడీపీలో యాక్టివ్‌గా లేకపోవడం అనే మాట వట్టిదేనని.. ఆ పార్టీలో ఎవరూ యాక్టివ్‌గా లేరన్నట్లుగా ఆమె చెప్పుకొచ్చారు. ఏదోటి గైడ్ చేయాలి.. గైడ్ చేస్తే పార్టీ నేతలు దాన్ని ఫాలో అవుతారన్నారు. రాజశేఖర్ రెడ్డి పార్టీలో జాయిన్ అయినప్పుడు ఆయన అదే చేశారన్నారు. సొంతగూటకి రావడం (వైసీపీలోకి) చాలా హ్యాపీగా ఉందని జయసుధ ఈ సందర్భంగా చెప్పుకొచ్చారు.