ஜெயம் ரவி நடிப்பில் கடந்த சில மாதங்களாக உருவாகி வந்த 'கோமாளி' திரைப்படத்தின் படப்பிடிப்பு முடிவடைந்து தற்போது இறுதிக்கட்ட தொழில்நுட்ப பணிகள் நடந்து வருகிறது. மேலும் இந்த படத்தின் புரமோஷன் பணிகளும் அவ்வப்போது நடந்து வந்தது.

இந்த நிலையில் இந்த படத்தின் ரிலீஸ் தேதியை ஜெயம் ரவி தனது சமூக வலைத்தள பக்கத்தில் சற்றுமுன் வெளியிட்டுள்ளார். இந்த படம் வரும் ஆகஸ்ட் 15ஆம் தேதி சுதந்திர தினத்தில் வெளியாகும் என்று ஜெயம் ரவி அறிவித்துள்ளார்,. ஆகஸ்ட் 15 வியாழக்கிழமை என்பதால் தொடர் விடுமுறை நாளில் இந்த படம் வெளியாவதால் திருப்தியான ஓப்பனிங் வசூல் கிடைக்கும் என எதிர்பார்க்கப்படுகிறது. பிரபாஸின் 'சாஹோ' திரைப்படமும் இதே நாளில் தான் ரிலீஸ் ஆகிறது என்பது குறிப்பிடத்தக்கது.

ஜெயம் ரவி, காஜல் அகர்வால், சம்யூக்தா ஹெக்டே, கேஎஸ் ரவிகுமார், யோகிபாபு, உள்ளிட்ட பலர் நடித்துள்ள இந்த படத்தை பிரதீப் ரங்கநாதன் இயக்கியுள்ளார். ஹிப்ஹாப் தமிழா ஆதி இசையில் ரிச்சர்ட் நாதன் ஒளிப்பதிவில் பிரதீப் ராகவ் படத்தொகுப்பில் உருவாகியுள்ள இந்த படத்தை வேல்ஸ் பிலிம்ஸ் இண்டர்நேஷனல் நிறுவனம் தயாரித்துள்ளது.