ஜெயம் ரவியின் மிருதனுக்கு ஏற்பட்ட திடீர் சிக்கல்
- IndiaGlitz, [Sunday,February 07 2016]
கடந்த 2015ஆம் ஆண்டு நான்கு படங்களில் நடித்து வெற்றி நாயகனாக வலம் வந்தவர் ஜெயம் ரவி. இவருடைய நடிப்பில் இவ்வருடம் வெளியாகவுள்ள முதல் படம் 'மிருதன்'. தமிழின் முதல் ஜோம்பி படமாக உருவாகியுள்ள இந்த படத்தை 'நாய்கள் ஜாக்கிரதை' படத்தை இயக்கிய சக்தி செளந்திரராஜன் இயக்கியுள்ளார்.
இந்நிலையில் 'மிருதன்' திரைப்படம் நேற்று சென்சார் அதிகாரிகளால் சென்சார் செய்யப்பட்டது. இந்த படத்திற்கு சென்சார் அதிகாரிகள் "A" சர்டிபிகேட் கொடுத்துள்ளனர். இதனால் தமிழக அரசின் வரிவிலக்கு கிடைக்க வாய்ப்பில்லை என்பதோடு குழந்தைகள் பார்க்க முடியாத படமாகவும் ஆகியுள்ளதால் படக்குழுவினர் அதிர்ச்சி அடைந்துள்ளனர். எனவே இந்த படத்தை ரிவைசிங் கமிட்டிக்கு அனுப்ப படக்குழுவினர் முடிவு செய்துள்ளனர்.
இந்த திரைப்படம் வரும் 12ஆம் தேதி ரிலீஸ் ஆகும் என எதிர்பார்க்கப்பட்ட நிலையில் தற்போது ரிலீஸ் தேதி தள்ளிப்போக வாய்ப்பு இருப்பதாக கூறப்படுகிறது. ரிவைசிங் கமிட்டிக்கு இந்த படம் சென்று வந்த பிறகே அதிகாரபூர்வ ரிலீஸ் தேதி அறிவிக்கப்படும் என தெரிகிறது.