ஜெயம் ரவி மற்றும் அரவிந்தசாமி இணைந்து நடித்த 'தனி ஒருவன்' திரைப்படம் மிகப்பெரிய வெற்றி பெற்றதோடு இந்த படம் தெலுங்கிலும் ரீமேக் செய்யப்பட்டு அங்கும் மிகப்பெரிய வரவேற்பை பெற்றது.

இந்நிலையில் மீண்டும் ஜெயம் ரவி, அரவிந்தசாமி இணைந்து நடித்துள்ள படம் 'போகன்'. இந்த திரைப்படத்தின் படப்பிடிப்பு மற்றும் போஸ்ட் புரடொக்ஷன்ஸ் பணிகள் முடிந்து ரிலீசுக்கு தயாராகிவிட்ட நிலையில் சற்று முன் இந்த படத்தின் சென்சார் தகவல்கள் வெளிவந்துள்ளது.

இந்த படத்திற்கு சென்சார் அதிகாரிகள் 'யூ' சான்றிதழ் அளித்துள்ளனர். இதனால் இந்த படம் தமிழக அரசின் வரிவிலக்கை பெறும் வாய்ப்பை பெற்றுள்ளது.

இந்நிலையில் 'போகன்' திரைப்படத்தின் சென்சார் முடிந்துவிட்டதால் மிகவிரைவில் இந்த படத்தின் ரிலீஸ் தேதி அதிகாரபூர்வமாக அறிவிக்கப்படவுள்ளது.

ஜெயம் ரவி, அரவிந்தசாமி, ஹன்சிகா, அக்சரா கெளடா உள்ளிட்ட பலர் நடித்துள்ள இந்த படத்தை பிரபுதேவா தயாரித்துள்ளார். டி.இமான் இசையமைத்துள்ள இந்த படத்தை லக்ஷ்மண் இயக்கியுள்ளார்.