ஜெயம் ரவி நடித்த இந்தியாவின் முதல் விண்வெளி திரைப்படமான 'டிக் டிக் டிக்' ரிலீசுக்கு தயாராகியுள்ள நிலையில் அவர் தற்போது அறிமுக இயக்குனர் கார்த்திக் தங்கவேல் இயக்கத்தில் ஒரு படத்தில் நடித்து வருகிறார். இந்த நிலையில் அவர் நடிக்கவுள்ள இன்னொரு படம் குறித்த தகவல் தற்போது வெளிவந்துள்ளது.

கடந்த 2015ஆம் ஆண்டு மும்பை வெடிகுண்டு சம்பவம் குறித்த திரைப்படமான 'பேபி' என்ற திரைப்படம் பாலிவுட்டில் வெளிவந்து சூப்பர் ஹிட் ஆகியது. அக்சயகுமார், ராணாடக்குபாய், அனுபம்கெர், டாப்சி உள்ளிட்ட பலர் நடித்த இந்த படத்தை நீரஜ் பாண்டே இயக்கியிருந்தார். இந்த படம் தற்போது தமிழில் ரீமேக் ஆகவுள்ளது

அக்சயகுமார் நடித்த இந்தியன் சீக்ரெட் ஏஜண்ட் கதாபாத்திரத்தில் ஜெயம் ரவி நடிக்கவுள்ளார். இந்த படத்தை ஏ.கே.அஹ்மத் இயக்கவுள்ளார். இவர் ஏற்கனவே 'என்றென்றும் புன்னகை மற்றும் 'மனிதன்' படங்களை இயக்கியவர் என்பது குறிப்பிடத்தக்கது. இந்த படத்திற்கு மதி ஒளிப்பதிவு செய்யவுள்ளார். இந்த படத்தில் நடிக்கும் மற்ற நட்சத்திரங்கள் மற்றும் தொழில்நுட்ப கலைஞர்களின் தேர்வு நடைபெற்று வருவதாகவும், இந்த படத்தின் படப்பிடிப்பு விரைவில் தொடங்கும் என்றும் கூறப்படுகிறது.