கோலிவுட் திரையுலகின் இளையதலைமுறை நடிகர்களில் ஒருவரான ஜெயம் ரவி தனது அடுத்த படத்தில் நாசா விஞ்ஞானியாக நடித்து வருவதாக செய்திகள் வெளியாகி உள்ளது.

ஜெயம் ரவி நடித்து வரும் 25வது திரைப்படம் ’பூமி’. இந்த படத்தின் படப்பிடிப்பு சமீபத்தில் முடிவடைந்த நிலையில் இந்த படத்தின் டீசர் சமீபத்தில் வெளியாகி மிகப்பெரிய வரவேற்பை பெற்றது என்பது தெரிந்ததே.

இந்த நிலையில் இந்த படத்தை இயக்கி வரும் இயக்குநர் லட்சுமணன் இந்த படத்தில் ஜெயம்ரவி நாசா விஞ்ஞானியாக நடித்துள்ளதாகவும் தமிழகத்தில் உள்ள சொந்த ஊரான தஞ்சாவூருக்கு திரும்பும் அவர் அங்கு விவசாயம் மற்றும் விவசாயிகளின் நிலை குறித்து அறிந்து அதிர்ச்சி அடைந்ததாகவும் அதன்பின்னர் விவசாயத்தை மீட்டெடுக்க அவர் நடத்தும் போராட்டங்கள் தான் இந்த படத்தின் கதை என்றும் கூறியுள்ளார்.

மேலும் இந்த படத்தில் ஜெயம் ரவி மற்றும் வில்லனுக்கும் இடையே நடக்கும் சண்டை காட்சிகள் தமிழ் சினிமாவில் இதுவரை இல்லாத வகையில் இருக்கும் என்றும் அவர் கூறியுள்ளார். டி.இமான் இசையில் சுஜாதா விஜயகுமார் தயாரிப்பில் உருவாகியுள்ள ’பூமி’ திரைப்படம் வரும் மே 1ம் தேதி ரிலீஸாகும் என எதிர்பார்க்கப்படுகிறது.