சமீபத்தில் சேகர் ரெட்டி வீடு மற்றும் அலுவலகங்களில் நடத்தப்பட்ட வருமான வரி ரெய்டில் சிக்கிய ஆவணங்களின் அடிப்படையில் இன்று காலை முதல் தலைமை செயலாளர் ராம்மோகன் ராவ் இல்லத்தில் வருமான வரித்துறையினர்களின் சோதனை நடைபெற்று வருகிறது. தமிழகத்தில் முதல்முறையாக தலைமைச்செயலாளர் வீட்டில் சோதனை நடந்து வருவதால் பெரும் பரபரப்பு ஏற்பட்டுள்ளது.

இந்நிலையில் இந்த பரபரப்பே இன்னும் நீங்காத நிலையில் தற்போது சென்னை தலைமை செயலகத்திலும் வருமான வரித்துறையினர் சோதனை செய்து வருவதாக தகவல்கள் வெளியாகி உள்ளது. குறிப்பாக தலைமைச் செயலாளரின் அறையில் இந்த சோதனை நடைபெற்று வருவதாகவும், இந்த சோதனையில் 20 அதிகாரிகள் ஈடுபட்டு உள்ளதாகவும், சோதனை செய்பவர்களுக்கு பாதுகாப்பாக துணை ராணுவப்படையினர் குவிக்கப்பட்டு உள்ளதாகவும் செய்திகள் வெளிவந்துள்ளது.

மேலும் இந்த சோதனை நடவடிக்கைகளால் சட்டம் ஒழுங்கு பிரச்சினை ஏற்படாமல் தடுக்கும் வகையில் சென்னை நுங்கம்பாக்கத்தில் உள்ள வருமான வரி அலுவலகத்திலும் துணை ராணுவப்படையினர் பாதுகாப்பு பணியில் ஈடுபடுத்தப்பட்டுள்ளதாக கூறப்படுகிறது.